शुक्रबार रातिदेखिको परेको अविरल वर्षाका कारण पहिरो खस्दा देशका विभिन्न सडक र राजमार्ग अवरुद्ध भएका छन् । नेपाल प्रहरीले सार्वजनिक गरेको रिपोर्टअनुसार सबैभन्दा बढी लुम्बिनी प्रदेशका १७ स्थानमा पहिरो खस्दा विभिन्न सडक तथा राजमार्ग अवरुद्ध भएका छन् ।
त्यस्तै, लुम्बिनी प्रदेशका १७, कर्णाली प्रदेशका तीन, सुदूरपश्चिमका पाँच, बागमतीका ६, कोशीका तीन र गण्डकी प्रदेशका ९ स्थानमा पहिरोले सडक अवरुद्ध भएको छ ।
पहिरोका कारण केही स्थानमा एकतर्फीरूपमा सडक सञ्चालन भइरहेका छन् भने केही ठाउँमा पूर्णरूपमा अवरुद्ध भएका छन् । सङ्खुवासभाको मकालु गाउँपालिका–३ मा आएको बाढीले दक्षिण कोशी राजमार्ग पूर्णरूपमा अवरुद्ध भएको छ ।
बाढी पहिरोले मकालु र भोटखोला गाउँपालिका जोड्ने खाँदबारी–किमाथांका सडक ठप्प भएको छ । यस्तै, रसुवाको स्याफ्रुवेशी धाम्बुचेत सडक खण्डमा पहिरो खस्दा सडक सुचारु गर्न १० दिन लाग्ने नेपाली प्रहरीले जनाएको छ ।
अविरल वर्षाले गर्दा पृथ्वी राजमार्गको इच्छाकामना गाउँपालिका–३ मा खसेको पहिरोले हटाइ अहिले एकतर्फी सडक सञ्चालनमा आएको छ । यस्तै, कान्तीलोकपथ र बीपी राजमार्ग पनि एकतर्फी सञ्चालनमा आएका छन् ।
बाढीले गर्दा मनाङको चामे बेँसीशहर सडक पनि पूर्णरूपमा अवरुद्ध भएको छ । सडक सुचारु गर्न ५ देखि ६ दिन लाग्ने जनाइएको छ । यसैगरी, कालीगण्डकी करिडोरअन्तर्गत नवलपरासीपूर्वको गैँडाकोटमा पहिरो खस्दा सडक पूर्णरूपमा अवरुद्ध भएको छ ।
