कैलालीको अत्तरियामा बस र मोटरसाइकल एक आपसमा ठोक्किँदा सशस्त्र प्रहरीका २ जना सहित ५ जना घाइते भएका छन् । शनिवार साँझ अत्तरिया धनगढी ६ लेन सडक खण्ड अन्तरगत सब्जी मन्डी अगाडी भएको दुर्घटनामा मोटरसाइकलमा सवार २ जना सशस्त्र प्रहरी र बसमा सवार ३ जना घाइते भएका हुन ।प्रदेश ट्राफिक प्रहरी कार्यालय अत्तरियाका अनुसार धनगढीबाट अत्तरिया तर्फ आइरहेको से १ ख ९१५ नम्बरको बसले सडक क्रस गरिरहेको सुपप्र ०१०१०प ८६३० नम्बरको मोटरसाइकललाई ठक्कर दिएको थियो ।
दुर्घटनामा मोटरसाइकल चालक डडेल्धुराको अजयमेरु गाउँपालिका – २ का ३० वर्षीय सशस्त्र प्रहरी सहायक हवलदार सुरत ऐर र सोही ठाउँकी २८ वर्षीय सशस्त्र प्रहरी जवान निलम बोहरा घाइते भएका छन् । दुवै जना सशस्त्र प्रहरीको वैद्यनाथ बाहिनी अत्तरियामा कार्यरत रहेका थिए ।
त्यस्तै उक्त दुर्घटनामा बसमा सवार गौरीगंगा नगरपालिका – ३ का ६५ वर्षीय मीन प्रभात जोशी, धनगढीकी २० वर्षीय करुणा चौधरी र घोडाघोडी नगरपालिका – ६ की ३ वर्षीय प्रियङ्कीत भण्डारी घाइते भएको प्रदेश प्रहरी कार्यालय अत्तरियाले जनाएको छ । बसमा अचानक ब्रेक लगाउँदा उनीहरू घाइते भएको प्रहरीको भनाइ छ ।
घाइते ४ जनाको अत्तरिया अस्पतालमा उपचार भइरहेको छ भने बायाँ खुट्टा र बायाँ हाटमा चोट लागेका मोटरसाइकल चालक ऐरलाई भारतको रुद्र अस्पतालमा लगिएको छ ।
बस र बस चालक गोदावरी नगरपालिका – १ का ३५ वर्षीय मीन बहादुर चौधरी र मोटरसाइकललाई इलाका प्रहरी कार्यालय मालाखेतीको नियन्त्रणमा रहेको जनाइएको छ
