काठमाडौं- सौर्य एयरलाइन्स व्यवस्थापनले बुधबार त्रिभुवन विमानस्थलमा भएको जहाज दुर्घटनामाबाट मर्माहत र भावविह्वल भएको जनाएको छ ।
शुक्रबार विज्ञप्ति जारी गर्दै सौर्यले मृतकका १८ जनाका परिवारजनलाई कम्पनीको तर्फबाट हुन सक्नेसम्मको सहयोग साथ र सदभाव रहने विश्वास दिलाएको छ ।
अध्यक्ष दीपक पोखरेल तथा कम्पनीकातर्फबाट जारी विज्ञप्तिमा भनिएको छ, ‘पीडित परिवारजनलाई कम्पनीको तर्फबाट हुन सक्नेसम्मको सहयोग, साथ र सदभाव सधैँ रहने विश्वास दिलाउछौँ ।
दुर्घटनामा परि बाँच्न सफल क्याप्टेन मनिषरत्न शाक्यको शिघ्र स्वास्थ्य लाभको कामनासमेत एयरलाइन्सले गरेको छ । उनको अहिले काठमाडौं मेडिकल कलेजमा उपचार भइरहेको छ । अवस्थामा सुधार भएपछि उनलाई सघन उपचार कक्षबाट निकालिएको छ ।
नियमित प्राविधिक परीक्षण तथा मर्मतका लागि पोखरा विमानस्थलतर्फ उडेको सौर्य एयरलाइन्सको विमान बुधबार बिहान ११ बजेर ११ मिनेटमा त्रिभुवन विमानस्थलमा दुर्घटनाग्रस्त भएको थियो।
उक्त दुर्घटनामा एकै परिवारका तीनसहित अधिकांश कम्पनीकै प्राविधिक कर्मचारीले ज्यान गुमाएका थिए । दुर्घटनामा को(पाइलट सुशान्त कटुवालसहित १८ जनाको ज्यान गएको थियो ।
