दाङमा कुवा सफा गर्ने क्रममा निसास्सिएर दुई जनाको मृत्यु भएको छ । तुलसीपुर उपमहानगरपालिका–१३ दमारगाउँमा कुवा सफा गर्ने क्रममा बुधबार दुई जनाको मृत्यु भएको हो ।
मृत्यु हुनेमा तुलसीपुर उपमहानगरपालिका–१३ दमारगाउँ निवासी ३८ वर्षीय यमबहादुर विक र १६ वर्षीय मुकेश विक रहेको इलाका प्रहरी कार्यालय तुलसीपुरका प्रहरी निरीक्षक दामप्रसाद श्रेष्ठले जानकारी दिएका छन् ।
कुवा सफा गर्न कुवाभित्र पसेका दुवैजना बेहोस भएपछि अम्बापुरमा रहेको नेपाली सेनाको वेस क्याम्पबाट अक्सिजनसहित गएको नेपाली सेना र नेपाल प्रहरीको टोलीले उद्धार गरेर उपचारका लागि राप्ती प्रादेशिक अस्पताल तुलसीपुरमा ल्याइएको थियो ।
बेहोस अवस्थामा अस्पतालमा ल्याइएका दुवैलाई चिकित्सकले ११ बजे मृत घोषणा गरेको प्रहरी निरीक्षक श्रेष्ठले जानकारी दिए । प्रहरी निरीक्षक श्रेष्ठले भने, ‘सुरुमा यामबहादुर कुवामा पस्नुभएको रहेछ । उहाँ कुवामा पसेर नबोलेपछि फेरी मुकेश जानुभएको र उहाँ पनि त्यही बेहोस भएपछि स्थानीयले प्रहरीलाई खबर गरेका रहेछन ।’ घटना करिब बिहान ९ बजेतिरको भएको प्रहरीले जनाएको छ ।
दुवै जना बिना डोरी करिब १५ हात गहिरो कुवामा पसेका कारण असजिलो हुनेबित्तकै निस्कन नसकेको प्रहरीले बताएको छ । उनीहरुको शवलाई पोष्टमार्टमका लागि राप्ती प्रादेशिक अस्पताल तुलसीपुरको शव गृहमा राखिएको छ ।
