काठमाण्डौ – सुनको भाउ लगातार चार दिनदेखि घट्न थालेको छ । सुनको भाउ चार दिनमा तोलामा १२ सय रुपैयाँले घटेको छ । आज पनि सुन तोलामा तीन सय रुपैयाँले घटेको छ । आज सुनको भाउ तोलाको एक लाख ५२ हजार रुपैयाँमा कारोबार भइरहेको नेपाल सुनचाँदी व्यवसायी महासङ्घले जनाएको छ ।
हिजो पनि सुनको भाउ ६ सय रुपैयाँले घटेर तोलाको एक लाख ५२ हजार तीन सय रुपैयाँ कायम भएको थियो । गएको भदौ १३ गते बिहीवार सुनको भाउ अहिलेसम्मकै उच्च तोलाको एक लाख ५३ हजार दुई सय रुपैयाँ पुगेको थियो । पछिल्लो समय सुनको भाउमा उतारचढाव हुँदै आएको छ ।
त्यस्तै आज चाँदीको भाउ पनि घटेको छ । चाँदीको भाउ २० रुपैयाँले घटेर एक हजार सात सय ७५ रुपैयाँ कायम भएको महासङ्घले जनाएको छ ।
