प्रधानमन्त्री केपी शर्मा ओली अमेरिका भ्रमण पूरा गरी आज स्वदेश फर्किंदै छन् । उनी आज अपराह्न चार बजे त्रिभुवन अन्तर्राष्ट्रिय विमानस्थलमा आइपुग्ने कार्यक्रम छ ।
संयुक्त राष्ट्रसंघको ७९ औं महासभामा भाग लिन प्रधानमन्त्री ओली असोज ४ गते न्युयोर्क गएका थिए ।
प्रधानमन्त्री ओलीले अमेरिकामा रहँदा असोज १० गते राष्ट्रसङ्घीय महासभालाई सम्बोधन गरेका थिए।
अमेरिका भ्रमणमा रहँदा विभिन्न छलफलमा भाग लिनुका साथै उच्च स्तरीय भेटवार्ता समेत गरेका उनले राष्ट्रसङ्घीय महासभालाई सम्बोधन गर्नु अघि असोज ७ गते कोलम्बिया विश्वविद्यालयमा आयोजित ‘नेपालको प्रजातन्त्र र आर्थिक समृद्धिको यात्रा’ विषयमा सम्बोधन गरेका थिए ।
त्यस्तै असोज ८ गते महासभाको साधारण बहसको उद्घाटनसत्र र असोज ९ गते अमेरिकाका राष्ट्रपति जो बाइडेनले आयोजना गरेको स्वागत समारोहमा सहभागी भएका थिए। उनले असोज ११ गते हार्वर्ड विश्वविद्यालयमा जोन एफ केनेडी जुनियर फोरममा ‘नेपालको परिप्रेक्ष्यः सङ्क्रमणकालीन न्यायबाट जलवायु न्याय’ विषयको कार्यक्रमलाई पनि सम्बोधन गरेका थिए ।
