कैलाली- कैलालीको धनगढी उपमहानगरपालिका सहितका स्थानीय तहमा कोरोनाविरुद्धको ‘फाइजर’ खोप दिन थालिएको छ । उपमहानगरका स्वास्थ्य शाखा प्रमुख योगेश अवस्थीले धनगढीका सबै वडामा आजदेखि कोरोनाविरुद्धको खोप अभियानका रुपमा लगाउन थालिएको बताए ।
अभियानमा १२ वर्षमाथि उमेर समूहका हालसम्म कोरोनाको खोप नलगाएका र यसअघि खोप लगाएर एक वर्ष पुगिसकेकाहरुलाई खोप दिन लागिएको छ । हाल कोरोना भाइरसको सङ्क्रमण नरहेपनि यसको भेरियन्ट परिवर्तन भइरहँदा जोखिम हुन सक्ने हुँदा तीन दिनसम्म अभियान सञ्चालन गर्न लागिएको अवस्थीले बताए ।
खोप अभियान सुदूरपश्चिम प्रदेशका कैलालीसहित बझाङ र डडेल्धुराका स्थानीय तहमा सुरु भइसकेको प्रदेश स्वास्थ्य निर्देशनालयले जनाएको छ । प्रदेशका नौ ओटै जिल्लामा अभियान सञ्चालनका लागि एक लाख ९ हजार मात्रा खोप उपलब्ध भएको निर्देशनालयका खोप कार्यक्रम सम्पर्क व्यक्ति मीनराज जोशीले बताए ।
