दैलेख, चैत ३ गते । उपभोक्ताको अधिकारलाई सुनिश्चित गर्न प्रविधिमैत्री अनुगमनमा जोड दिनुपर्ने सरोकारवाला निकायले बताएका छन् । विश्व उपभोक्ता अधिकार दिवसका अवसरमा आयोजित कार्यक्रममा प्रविधिमैत्री अनुगमन गर्न आवश्यक रहेको बताइएको हो ।

निमित्त प्रमुख जिल्ला अधिकारी गणेशप्रसाद कोइरालाले नेपालले अन्तर्राष्ट्रियस्तरमा गरेका सम्झौता, बनेका नीति नियम बने पनि त्यसको कार्यान्वयन गर्न कठिनाइ भएको बताउनुभयो । उहाँले उपभोक्ताको अधिकारलाई ध्यानमा राखी जिल्ला प्रशासन कार्यालयको अगुवाइमा बजार अनुगमन गर्ने गरिएको तर बजार अनुगमन गर्ने प्रविधि नभएका कारण अनुगमन प्रभावकारी हुन नसकेको उल्लेख गर्नुभयो । उहाँले बजार अनुगमन गर्न जाँदा आवश्यक उपकरण नहुँदा उपभाक्ताको अधिकार उल्लङ्घन गर्नेलाई कारबाही गर्न नसकिएको बताउनुभयो ।

उद्योग वाणिज्य सङ्घका वरिष्ठ उपाध्यक्ष नरेन्द्र थापाले सङ्घमा आबद्ध भएका व्यवसायीलाई उपभोक्ताको अधिकारको ख्याल गरी व्यापार व्यवसाय गर्न व्यवसायीलाई आग्रह गरिएको बताउनुभयो । उहाँले उद्योगी व्यवसायीलाई पटक पटक सचेतना गराइएको भन्दै बेला बेलामा अनुगमन गर्ने काम पनि गरेको जानकारी दिनुभयो ।

गैरसरकारी संस्था महासङ्घ दैलेखका डिलकुमारी चन्दले उपभोक्ताको अधिकारका लागि उपभोक्ता नै जाग्नुपर्ने बताउनुभयो । उहाँले उपभोक्ताले आफूले उपयोग गर्ने सामग्री गुणस्तर भए नभएको वा ठगी भएको विषयमा सम्बन्धित निकायमा उजुरी गर्ने गरेको खण्डमा उपभोक्ता अधिकार सुनिश्चित हुने जिकिर गर्नुभयो । उपभोक्ता अधिकार मञ्चका अध्यक्ष अम्मर सुनारले उपभोक्ता आफैँ जागरुक नभएसम्म अधिकार स्थापित हुन नसक्ने बताउनुभयो । उहाँले अधिकारका लागि उपभोक्ता जागरुक हुने र बदमासी भएकालाई कानुनी कठघरामा उभ्याइएको अवस्थामा मात्र त्यसले सार्थकता पाउने उल्लेख गर्नुभयो ।

उद्योग तथा उपभोक्ता हित संरक्षण कार्यालय दैलेखका कार्यक्रम अधिकृत पर्शुराम आचार्यले बजार अनुगमन गर्ने गरिएको भए पनि आफूहरूसँग गुणस्तर परीक्षण प्रविधि नहुँदा अनुगमन प्रभावकारी हुन नसकेको बताउनुभयो । उहाँले उपभोक्ता संरक्षण ऐन, २०७५ ले वस्तु वा सेवाको सहज पहुँच, स्वच्छ प्रतिस्पर्धात्मक मूल्यमा गुणस्तरीय वस्तुको बिक्री गर्नुपर्ने प्रावधान भए पनि त्यसको कार्यान्वयनमा समस्या भएको जानकारी दिनुभयो ।