धनगढी- कैलाली जिल्लाका दुई छुट्टाछुट्टै स्थानबाट खैरो हेरोइन जस्तो देखिने लागूऔषधसहित तीन जना पक्राउ परेका छन्।
बर्दगोरीया गाउँपालिका–२, बौनिया बजारमा बिहीवार साँझ साढे चार बजे प्रहरीले १ ग्राम २०० मिलिग्राम लागुऔषध खैरो हेरोइनसहित दुई जनालाई पक्राउ गरेको छ। सोही स्थानका २१ वर्षीय उमेश ताम्राकारले चलाएको सुदूरपश्चिम प्रदेश ०१–००९ प १२२७ नम्बरको मोटरसाइकल र साथमा रहेका २१ वर्षीय बिवेक सोनीलाई प्रहरीले नियन्त्रणमा लिएको हो।
दुवै जनालाई मोटरसाइकलसहित इलाका प्रहरी कार्यालय सडकपुरबाट खटिएको टोलीले नियन्त्रणमा लिई आवश्यक अनुसन्धान सुरु गरेको छ। यस्तै, धनगढी उपमहानगरपालिका–१०, जुगेडाबाट सोही ठाउँका २२ वर्षीय कमल रानालाई पनि लागुऔषधसहित पक्राउ गरिएको छ।
बिहीवार साँझ साढे पाँच बजे वडा प्रहरी कार्यालय धनगढी र लागूऔषध नियन्त्रण ब्यूरो शाखा कार्यालय धनगढीबाट खटिएको संयुक्त प्रहरी टोलीले रानाको साथबाट २ ग्राम ७१० मिलिग्राम खैरो हेरोइन जस्तो देखिने धुलो पदार्थ बरामद गरेको हो। पक्राउ परेका तीनै जनामाथि लागूऔषध सम्बन्धी मुद्दामा अनुसन्धान भइरहेको प्रहरीले जनाएको छ।
