धनगढी– कैलालीको गोदावरी नगरपालिका– ४ मा रहेको ज्वाला देवी युवा क्लबले सञ्चालन गरेको चित्रकला प्रतियोगिता सम्पन्न भएको छ । यही वैशाख १३ गतेदेखी क्लबले सुरु गरेको चित्रकला प्रतियोगिता शनिबार सम्पन्न भएको हो ।
प्रतियोगितालाई अत्तरिया मिडिया प्रा.लि., कर्मा एजुकेशन कल्सल्टेन्सी र डाडाँबाग कम्प्युटर एण्ड प्रिन्टिङ सेन्टरले सहयोग गरेको थियो । प्रतियोगिता तिन चरणमा सञ्चालन गरिएको थियो । जसमध्ये पहिलो र दोस्रो चरणमा ५६ जना प्रतियोगीहरु सहभागि रहेको प्रतियोगिताका संयोजक एवम् क्लबका सदस्य मदन कापडीले जानकारी दिए ।
उनका अनुसार प्रतियोगिताको फाईनल चरणमा भने १६ जना प्रतियोगीहरु पुगेका थिए । वैशाख १३ गतेदेखी प्रत्येक शनिबार आयोजना गरिएको प्रतियोगितामा वडाभित्रका बालबालिकाहरुको मात्रै सहभागिता रहेको उनले बताए ।
प्रतियोगितामा कल्पना ओलीले प्रथम, शिवानी बलायरले द्धितिय, कायरा बिष्टले तृतिय र प्रभास बिष्टले चौथो स्थान प्राप्त गरे । त्यसबाहेक निरज मल्लले सर्वाेत्कृष्ट पुरस्कार प्राप्त गरे । प्रतियोगिताको फाईनल चरणसम्म पुग्ने १६ जना प्रतियोगीहरुलाई प्रमाणपत्र प्रदान गरिएको थियो भने प्रथम, द्धितिय, तृतिय र चौथो स्थान हासिल गर्ने प्रतियोगीहरुलाई स्टेशनरी तथा चित्र बनाउन आवश्यक सामग्रीहरु प्रदान गरिएको थियो ।
त्यतिमात्रै नभई फाईनल चरणमा पुगेका १६ जनालाई नै चित्रकला सम्बन्धी थप तालिमको व्यवस्था गरिएको प्रतियोगिता संयोजक कापडीले जानकारी दिए ।
