कञ्चनपुर, नेपाल | नेपालभर उल्लासपूर्ण वातावरणमा मनाइएको अन्तर्राष्ट्रिय धान दिवसको अवसरमा कञ्चनपुर जिल्लाको कृषि विकास फार्म, सुन्दरपुरमा विशेष धान रोपाइँ कार्यक्रम सम्पन्न भयो।
यो अवसरमा द आर्ट अफ लिभिङ्ग का वरिष्ठ अन्तर्राष्ट्रिय प्रशिक्षक तथा विश्वप्रसिद्ध आध्यात्मिक गुरु श्रीश्री रविशंकरजीका शिष्य ब्रह्मचारी श्रीचैतन्यजी प्रमुख अतिथिका रूपमा उपस्थित हुनुहुन्थ्यो।
समारोहमा ब्रह्मचारीजी आफैं खेतमा उत्रेर परम्परागत शैलीमा धान रोप्दै कृषक समुदायप्रतिको सम्मान प्रकट गर्नुभएको थियो। उहाँसँगै फार्म प्रमुख वासुदेव भटराई, तालिम प्रमुख यज्ञराज जोशी, द आर्ट अफ लिभिङ्गका प्रशिक्षक शैलेन्द्र हमाल, स्थानीय किसान र युवा स्वयंसेवकहरू समेत ठूलो संख्यामा सहभागी थिए।
कार्यक्रमलाई सम्बोधन गर्दै ब्रह्मचारी श्रीचैतन्यजीले भन्नुभयो :
“कृषि केवल जीविकोपार्जनको माध्यम होइन, यो हाम्रो संस्कृति र पहिचान हो। धान मात्र अन्न होइन, जीवनको आधार हो। किसानको परिश्रम र निष्ठाले नै राष्ट्र आत्मनिर्भर र समृद्ध बन्छ।”
उहाँले युवाहरूलाई परम्परागत ज्ञानसँगै आधुनिक कृषि प्रविधिको संयोजन गर्दै जैविक मल, प्राकृतिक खेती र जलस्रोत संरक्षणमा विशेष ध्यान दिन आग्रह गर्नुभयो।
कृषकहरूसँग अन्तरक्रिया गर्दै ब्रह्मचारीजीले वातावरणमैत्री खेती, बीउ संरक्षण, र ग्रामीण अर्थतन्त्र सुदृढीकरणका उपायबारे मार्गदर्शन गर्नुभएको थियो।
कार्यक्रमका सहभागीहरूले धान दिवसलाई आत्मनिर्भरता, सहकार्य र वातावरणीय चेतनाको प्रेरणादायी दिवसको रूपमा स्मरणयोग्य बनाएको बताउँदै खुसी व्यक्त गरे।
यो कार्यक्रम कृषि मात्र नभई परम्परा, संस्कार र सामूहिकताको भावनाले भरिएको उत्सवका रूपमा सम्पन्न भयो।
