मानव बेचबिखन रोकथाममा कैलाली प्रहरी उत्कृष्ट भएको छ । महिला बालबालिका तथा ज्येष्ठ नागरिक मन्त्रालयले जिल्ला प्रहरी कार्यालयलाई मानव बेचबिखन रोकथाम र नियन्त्रणका लागि उत्कृष्ट ठहर गर्दै बुधवार एक कार्यक्रमका बिच कार्यालय प्रमुख प्रहरी उपरीक्षक विश्व अधिकारीलाई सम्मान गरेको हो ।
मानव बेचबिखनलाई गम्भीरतापूर्वक लिँदै त्यस्ता घटना नियन्त्रणका लागि प्रयास गर्ने, र त्यस्ता घट्नामा संलग्न व्यक्तिहरूका बिरुद्ध मुद्दा दर्तादेखि पीडितलाई न्याय दिलाउन जिल्ला प्रहरी कार्यालय कैलालीले उत्कृष्ट कार्य गरेको मन्त्रालयले जनाएको छ । पुरस्कार तथा सम्मान वितरण कार्यक्रममा राष्ट्रिय योजना आयोगका सदस्य सलोनी प्रधान सिंह र मन्त्रालयका सचिव याम कुमारी खतिवडा(वास्कोटा)ले जिल्ला प्रहरी कार्यालय कैलालीका प्रमुख प्रहरी उपरीक्षक विश्व अधिकारीलाई सम्मान प्रदान गरेका हुन् । समान ग्रहण पछि प्रहरी उपरीक्षक अधिकारीले सम्मानले हौसला र थप ऊर्जा प्राप्त भएको बताए ।
जिल्लाको शान्ति सुरक्षा मजबुत हुँदै गएको बताए । ‘हामी प्रहरीहरूले सत्यको पक्षमा वकालत गर्दै जनताको सेवा गर्ने हो,उनले भने,‘सक्दो राम्रो गर्ने प्रयास गरिरहेका छौँ।‘ १५ औँ मानव बेचबिखन तथा ओसार पसार नियन्त्रण राष्ट्रिय दिवसको अवसरमा २०७८ साल भाद्र २० गते नेपाल सरकार महिला बालबालिका तथा ज्येष्ठ नागरिक मन्त्रालयले मानव बेचबिखन तथा ओसार पसार नियन्त्रणमा जिल्ला प्रहरी कार्यालय कैलालीले गरेको उल्लेखनीय कार्यको मूल्याकंन गर्दै जिल्ला प्रहरी कार्यालय कैलालीलाई सर्वोत्कृष्ट जिल्ला घोषणा गरेका थियो । जिल्ला प्रहरी कार्यालय कैलालीले विगत एक बर्षमा मानव बेचबिखन तथा ओसार पसार गरेको कसुरमा १६ वटा घटनामा २६ जनालाई पक्राउ गरी मुद्दा चलाएको थियो । १६ वटा मुद्दामध्ये ९ वटा मुद्दा मानव बेचबिखनका साथसाथै जबरजस्ती करणीमा समेत चलाएको थियो ।
त्यसै गरी यस अवधिमा कैलाली प्रहरीले सहयोगी संस्था तथा भारतीय प्रहरीको सहयोग र समन्वयमा १४ वर्षीय बालिकालाई भारतको बैंगलोरबाट उद्धार गरी पारिवारिक पुनर्मिलन गराई दोषी उपर मानव बेचबिखन तथा ओसार पसार र जबरजस्ती करणीमा मुद्दा चलाएको थियो । सोही अवधिमा जिल्ला प्रहरी कार्यालय कैलालीले विभिन्न सङ्घ संस्था सँगको सहयोग र समन्वयमा ८६ जना महिला, २ बालक र ३८ बालिका गरी १२६ जनालाई सीमा नाकाबाट उद्धार गरी परिवारमा फर्काइएको थियो भने ३ महिला, १७ बालक र १० बालिका गरी ३० जनालाई बेवारिसे तथा अलपत्र अवस्थामा फेलापारि उनीहरुको उद्धार तथा पारिवारिक पुर्नमिलन गराएको थियो ।
मानव बेचबिखन तथा ओसार पसार नियन्त्रणका लागी जिल्ला प्रहरी कार्यालय कैलालीले समुदाय प्रहरी साझेदारी अन्तर्गत विभिन्न जनचेतना मूलक कार्यक्रमहरू गर्नुका साथै शान्ति पुनर्स्थापना गृह, माइती नेपाल लगायतका सङ्घ संस्थाहरू संग समन्वय तथा सहकार्य गरी सीमा निगरानी, उद्धार, राहत, निःशुल्क कानुनी परामर्श जाहेरी लेखन, औषधी उपचार, सुरक्षित आवास, मनोविमर्श, पारिवारिक पुनर्मिलन जस्ता सेवाहरू प्रदान गर्दै आई रहेको छ ।
