धनगढी-कोरोनाकोे दोश्रो लहर बढिरहेको बेलामा कैलालीको गौरीगंगा नगरपालिकाले आफ्नै कोभिड १९ कोभिड अस्पताल सञ्चालन गरेर कोभिड संक्रमितहरुको उपचार गरिरहेको छ ।
कोभिड १९ को दोश्रो लहर बढ्न शुरु भएको लगत्तै नगरपालिकाले चौमालाा प्राथमिक स्वास्थ्य केन्द्र नजीकै अस्थायी कोभिड अस्पताल सञ्चालन गरेको हो ।
अस्पतालमा आफ्ना पालिकाका कोरोना संक्रमितहरुको उपचार गर्ने गरिएको गौरीगंगा नगरपालिकाका जनस्वास्थ्य निरीक्षक इश्वरी प्रसाद भुषाल बताउँछन् । ‘कोभिड संक्रमितहरुको उपचारका लागि सबै ठाउँका अस्पतालहरुमा बेड पाउन अहिले गाह्रो छ ।’ जनस्वास्थ्य निरीक्षक भुषालले भने ‘त्यसैले आफ्ना पालिकाका बासिन्दाहरुले कोभिडको उपचारका लागि बाहिर जान नपरोस् भनेर आफ्नै अस्थायी कोभिड अस्पताल सञ्चालन गरेका छौं ।’
चौमालमा स्वास्थ्य केन्द्रको नजीकै रहेको खाली भवनको मर्मत गरेर नगरपालिकाले कोभिड अस्थायी अस्पताल सञ्चालन गरेको हो । अस्पतालमा सेवा दिनका लागि एक जना चिकित्सकको पनि नगरपालिकाले व्यवस्था गरेको छ । आवश्यकता अनुसार प्राथमिक स्वास्थ्य केन्द्रका स्वास्थ्यकर्मीहरुले पनि सृवा दिने गरेका छन् ।
अस्पतालमा ४ वटा अकिसजन कन्सन्ट्रेटर र १० अक्सिजन सिलिण्डरको व्यवस्था छ । अस्थायी कोभिड अस्पतालमा ठाउ नपुगेमा इमरजेन्सी प्रयोगका लागि स्वास्थ्य चौकीका क्वार्टहरहरु पनि खाली अवस्थामा राखिएको भुषालले बताए ।
अहिलेसम्म अस्थायी कोभिड अस्पतालमा उपचार गरेर १० महिला र १७ पुरुष गरि २७ जना निको भएर फर्किसकेका छन् भने ४ महिला र १४ पुरुषको उपचार भैरहेको छ ।
जनस्वास्थ्य निरीक्षक भुषालका अनुसार डोटीमा कोरोना संक्रमित भएका र धनगढीमा कोरोना संक्रमित भएर अक्सिजन पाउन नसकेका गौरीगंगा नगरपालिकाका ४ जना बासिन्दाहरुलाई चौमालाको आफ्नै अस्थायी अस्पतालमा ल्याएर उपचार गरिएको थियो ।
अस्थायी कोभिड अस्पतालको सञ्चालनले पालिकाका वासिन्दाले कोरोना संक्रमणका कारण अप्ठेरो भएमा टाढा जानु पर्ने समस्याको अन्त्य भएको बताए ।
गौरीगंगा नगरपालिकामा हालसम्म पीसीआर परिक्षणमा १ शय ७ र एन्टिजेन परिक्षणमा ५६ जना गरि एक शय ६३ जनामा कोरोना संक्रमण पुष्टि भएको छ । हाल २२ महिला र ४३ पुरुष होम आइसोलेसनमा रहेका छन् । नगरपालिकाले प्रत्येक हप्ता मंगलबार र शुक्रवार सम्भावित संक्रमितहरुक स्वाब संकलन गर्ने गरेको छ ।
