बैतडी -कोरोना संक्रमित खोज्न सुर्नया गाउँपालिकाले गाउँगाउँमा स्वास्थ्यकर्मी परिचालन गरेको छ।

गाउँपालिकाले स्वास्थ्यकर्मी घरघरमै पठाएर शंकास्पद बिरामीहरुको एन्टिजेन विधिबाट कोरोना परीक्षण गर्न थालेको छ। कोरोना संक्रमण रोकथाम तथा न्यूनीकरण गर्न शंकास्पद बिरामी भएका ठाउँमा एन्टिजेन विधिबाट कोरोना परीक्षण गर्ने गरिएको गाउँपालिकाका स्वास्थ्य शाखा प्रमुख रामसिंह महराले बताए।

गाउँपालिकासँग दुई सय एन्टिजेन किट रहेको र ती किटमार्फत कोरोना परीक्षण गरिरहेका छौं,ु उनले भने, ‘वडातहमा रहेका स्वास्थ्यकर्मीलाई गाउँगाउँमा परीचालन गरेका छौं।ु

कोरोना नियन्त्रण तथा रोकथाम अहिले पालिकाको प्राथमिकतामा रहेको गाउँपालिकाका अध्यक्ष वीरबहादुर विष्टले बताए। उनले भने, ‘समुदायस्तरमा कोरोना संक्रमण नफैलियोस् भनेर परीक्षणको दायरा बढाएका छौं।’

कोरोना संक्रमण रोकथाम तथा नियन्त्रणका लागि स्वास्थ्यका मापदण्ड पालना गर्नुका साथै समुदायमा रहेका शंकास्पद बिरामीहरुको परीक्षण गर्ने कार्य भइरहेको विष्टको भनाइ छ।

हालसम्म गाउँपालिकाको वडा नं ४, ५ र ८ मा बढी शंकास्पद बिरामी भेटिएकाले ती वडामा परीक्षण बढाइएको जनाइएको छ। कोरोना संक्रमितका लागि गाउँपालिकाले वासुलिंग स्वास्थ्यचौकीमा ३२ बेडको आइसोलेसन कक्ष निर्माणसमेत गरेको छ।

समयमै रिपोर्ट नआउँदा समस्या

जिल्ला अस्पताल बैतडीमा रहेको पिसिआर प्रयोगशालाबाट समयमै रिपोर्ट नआउँदा समस्या भएको छ। शंकास्पद बिरामीको स्वाब संकलन गरी पठाएको एक हप्तासम्म पनि रिपोर्ट नआउँदा समस्या हुने गरेको हो। जिल्ला अस्पतालको प्रयोगशालाबाट ढिलो रिपोर्ट आउँदा कोरोना नियन्त्रणमा चुनौती थपिएको छ।

सुर्नया गाउँपालिकाले शंकास्पद बिरामीको स्वाब संकलन गरी पठाएको भए पनि एक हप्तासम्म पनि प्रयोगशालाबाट रिपोर्ट नआएको जनाएको छ। गाउँपालिकाका स्वास्थ्य शाखा प्रमुख रामसिंह महराले बिरामीको स्वाब संकलन गरेर पठाएको एक हप्ता बढी भइसक्यो तर पनि रिपोट अझै नआएको बताए।

उनले भने, ुरिपोट नआउँदासम्म कोही पनि आइसोलेसनमा बस्न मान्दैनन्। स्वाबको रिपोट ढिलो आउँदा गाउँमा संक्रमणको जोखिम बढ्दै गएको छ।’

प्रयोगशालामा संकलित स्वाबको चाप बढी भएकाले समयमा रिपोर्ट आउन ढिलाइ हुने गरेको जनाएको छ। अहिले पनि जिल्ला अस्पतालको प्रयोगशालामा एक हजार स्वाब परीक्षण गर्न बाँकी छन्।

जिल्ला अस्पताल बैतडीका प्रमुख डा। वसन्तराज जोशीका अनुसार दैनिक चार सय बढी स्वाबको परीक्षण हुने भए पनि स्वाबको चाप बढी हुँदा समयमा रिपोर्ट आउन ढिलाइ हुने गरेको हो। उनले भने, ‘प्रयोगशालामा स्वाबको चाप बढिरहेको छ, यसैबीच केही दिनअघि प्रयोगशालामा परीक्षणका लागि आवश्यक केमिकल अभाव भएको ढिलाइ भयो।’

प्रयोगशालाले हाल केमिकल आपूर्ति भइसकेकोले अब भने परीक्षणमा ढिलाइ नहुने जनाएको छ। बैतडीमा हाल कोरोनाका ८ सय बढी सक्रिय संक्रमित छन् भने १४ जनाको मृत्यु भइसकेको छ।