सुदूरपश्चिम प्रदेश सरकारका मुख्यमन्त्री त्रिलोचन भट्टले मन्त्री मण्डल विस्तार गरेका छन् ।भौतिक पूर्वाधार विकास मन्त्रीको जिम्मेवारी दीर्घ सोडारी, आर्थिक मामिला तथा योजना मन्त्रीमा प्रकाश शाह,उद्योग पर्यटन वन तथा वातावरण मन्त्रीमा मानबहादुर धामी, सामाजिक विकास मन्त्रीमा लालबहादुर खड्का र आन्तरिक मामिला तथा कानुन मन्त्रीमा पूर्णा जोशीलाई जिम्मेवारी दिइएको छ ।
यस्तै भौतिक पूर्वाधार विकास राज्यमन्त्रीमा चुनकुमारी चौधरी, सामाजिक विकास राज्य मन्त्रीमा मना साउद, भूमि व्यवस्था कृषि तथा सहकारी राज्यमन्त्रीमा मानबहादुर सुनार र आर्थिक मामिला तथा योजना राज्यमन्त्रीमा अर्चना गहतराजले जिम्मेवारी पाएका छन् ।
शुक्रवार सुदूरपश्चिम प्रदेशका प्रदेश प्रमुख गङ्गा प्रसाद यादवले उनीहरूलाई शपथ ग्रहण गराएका छन् ।
तत्कालीन नेकपा विवादपछि मुख्यमन्त्री भट्टले भौतिक पूर्वाधार विकास मन्त्री पठान सिंह बोहरालाई पदमुक्त गरेका थिए। भने आर्थिक मामिला तथा योजना मन्त्री झपट बोहराले पदबाट राजीनामा दिएका थिए। मुख्यमन्त्री भट्टले भौतिक पूर्वाधार विकास मन्त्रालयको जिम्मेवारी आफै सम्हालेका थिए।
आर्थिक मामिला तथा योजना मन्त्रालयको जिम्मेवारी आन्तरिक मामिला तथा कानुनसमेत रहेका प्रकाश शाहलाई दिएका थिए। सामाजिक विकासमन्त्री कृष्णराज सुवेदी र पर्यटन, वन तथा वातावरणमन्त्री माया भट्टले पनि राजीनामा दिएका छन् ।
