डडेल्धुरा – डडेल्धुराको परशुराम नगरपालिका–८ की २६ वर्षीया अस्मिता धामीको शव परीक्षण भएको छ। असार ५ गते मृत अवस्थामा फेला परेकी धामीको शव तीन दिनपछि सोमबार जोगबुडा अस्पतालमा परीक्षण गरिएको हो ।
पोष्टमार्टम रिपोर्ट आउन अझै केहि दिन लाग्ने प्रहरीले जनाएको छ । उनको भिसेरा परीक्षण गरिने जनाइएको छ ।
उनको हत्या गरिएको र बलात्कार भएको भन्नेबारे कुनै तथ्य फेला नपरेको भएपनि शरिरमा निलडाम देखिएको, शव फेला परेको स्थानसम्म घिसारेको जस्तो र उक्त स्थानमा मदिराको खालि बोत्तल फेला परेकाले उनको विभत्स हत्या गरिएको स्थानीयले बताइरहेका छन्। यद्यपि प्रहरीले आफ्नो अनुसन्धान सकेको छैन।
असार २ गते आधारभूत स्वास्थ्य ईकाइ केन्द्र जमरानीबाट कोरोनाको बचत खोप र स्वास्थ्य सामग्री लिएर जोगबुडा अस्पताल पुर्याउन भनी निस्केकी अस्मिताको शव परशुराम नगरपालिका–९ को हट्वानी सामुदायिक वनमा फेला परेको थियो।
घटनाको अनुसन्धानका लागि जिल्ला प्रहरी कार्यालय डडेल्धुरा, संघीय प्रहरी इकाइ कार्यालय र प्रदेश प्रहरी कार्यालयबाट छुट्टाछुट्टै टोली खटाइएको छ।
यसैबिच अस्मिता धामीको हत्यामा संलग्नलाई कारबाहीको माग गर्दै स्थानिय आन्दोलनमा उत्रिएका छन् ।
उनिहरुले घट्नाको सत्यतत्य अनुसन्धान गरी दोषीलाई हदैसम्मको कारबाहीको माग गरेका हुन्।आन्दोलनकारीले ‘धामीलाई न्याय दे, घटनाको सत्य तथ्य छानबिन गर, महिला हिंसा अन्त्य गर, धामीको बलात्कार गरि हत्या गर्नेलाई फाँसि दे, स्थानीय सरकार कान खोल’ लगाएतका माग राखेका छन्।
