सातायताको लगातार वर्षाले जिल्लाका अधिकांश ठाउँमा पहिरो खसेको छ । बाढीपहिरोले बाटोघाटोमा क्षति पुग्दा पैदल हिँड्नसमेत समस्या छ । असारको सुरुकै वर्षाले ग्रामीण सडकहरू बन्द भइसकेका छन् । सडक तथा पैदल हिँड्ने बाटोमा बाढी र पहिरोले धेरै ठाउँमा क्षति पुगेको स्थानीयले बताएका छन् ।
जिल्लाको व्यास र दुहुलाई सदरमुकाम जोड्ने सडक तथा घोडेटो बाटोमा आधा दर्जनभन्दा बढी ठाउँमा पहिरो खसेको छ । व्यासको धौलाकोटमा ठूलो पहिरो खसेको छ । टिंकर सडक कटिङ भइरहेको धौलाकोटमा पहिरो आउँदा करिब २० मिटर बढी बाटो भत्केको छ ।
उक्त बाटो भत्किँदा व्यासका स्थानीयलाई आवतजावत गर्न डेढ घण्टाको लामो बाटो थप हिँड्नु परेको व्यासका स्थानीय मनिराज भट्टले बताए । भीरको बाटो भएकाले माथिबाट ढुंगा खस्ने जोखिम धेरै हुन्छ । उक्त बाटोको बहुगाउँ नजिक, हिकिलाको पोखरा भीर, तिमुरपाटा तथा राताकाठा क्षेत्रमा पहिरो खसेको हुनाले सदरमुकाम आउन साह्रै समस्या परेको भट्टको भनाइ छ ।
खलंगा–दल्लेख सडक खण्डको सेलादेखि सदरमुकाम खलगा नजिकसम्म ठूलठूला पहिरो खसेका छन् । मालबेलामा ठूलो पहिरो खसेकाले पैदलयात्रीका लागि पनि जोखिम रहेको छ । चाररपाँच किमिको दूरीका आधा दर्जन बढी ठाउँमा सडकको माथि र तलबाट पहिरो खसेको काटैका स्थानीय सुरज जोशीले बताए । धेरै ठाउँमा पहिरो खसेको हुनाले सवारीसाधन चल्न त परै जाओस् मानिसलाई पैदल हिँड्नसमेत जोखिम छ ।
मालबेला, डुङरे, सेला, जाखलगायतका ठाउँहरूमा पहिरो खसिरहेको छ । पहिरोले उक्त बाटो हिँड्न अप्ठ्यारो हुँदा काटैदेखि माथिका स्थानीय जाइझुल, बाज हुँदै सदरमुकाम आउनुपर्ने बाध्यता रहेको उनको भनाइ छ । तल्लो क्षेत्रका स्थानीय भने जोखिम मोलेर पहिरो आएकै स्थानमा हिँड्डुल गर्न बाध्य छन् ।
सेला नजिकै ठूलो पहिरो खसेकाले वैकल्पिक मार्ग प्रयोग गरी खोला किनार भएर यात्रा गर्नुपर्ने अवस्था रहेको नौगाड गाउँपालिका–२ दल्लेकका दलजित बोहराले बताए । ‘पहिरो खसिरहन्छ, पहिरो रोकिने बित्तिक्कै दगुरेर यात्रा गर्नुपर्ने अवस्था छ,’ उनले भने, ‘सेला नजिक र मालबेला नजिकैको क्षेत्रमा पैदल यात्रासमेत गर्न बाटो नरहेकाले सडकभन्दा तल खोला किनारको बाटो भएर आवतजावत गर्नुपर्ने अवस्था छ ।’ सदरमुकामबाट नौगाड तथा मार्मा जोड्ने देथला–खार–खलंगा सडकसमेत अवरुद्ध रहेकाले स्थानीयलाई झन् सास्ती भइरहेको उनको भनाइ छ ।
एक सातायता जिल्लाको मुख्य महाकाली लोकमार्ग ५ पटक अवरुद्ध भयो । आइतबार र शनिबार दिनमै दुईरदुई पटक विभिन्न ठाउँमा अवरुद्ध भएको सडक स्थानीय र सुरक्षाकर्मी मिलेर सञ्चालनमा ल्याएको दार्चुलाका प्रहरी प्रमुख डीएसपी मनोहरप्रसाद भट्टले बताए । ‘जिल्लाको मुख्य मार्ग भएको हुनाले महाकाली राजमार्ग दिनभरि बन्द हुन दिएनौं,’ डीएसपी भट्टले भने, ‘लगातारको वर्षाका कारण बाढी र पहिरोले यो अवधिमा धेरै पटक बन्द भयो । तर, सबै पक्षको सहयोगले दिनभरि बन्द हुन पाएन ।’ कच्ची सडक मार्गका रहेका जिल्लाका अन्य सहायक मार्ग भने तीनरचार दिनदेखि बन्द अवस्थामा छन् ।
यस्तै, गोकुलेश्वर–लटिनाथ, लटिनाथ–पारिबगर, गोकुलेश्वर–देथला–खार–खलंगा सडक खण्डका विभिन्न स्थानमा समेत पहिरो खसेको छ । जिपहरू चल्न नसकेकाले नौगाड, मार्मा र अपिहिमाल गाउँपालिकाका स्थानीयहरू नौगाडको सिप्टी दल्लेक हुँदै खार–खलंगा सडक भएर खलंगा आउने गरेका छन् । उता बिटुले–पारिबगड सडकको रेल पहिरो र कोपरे भन्ने स्थानमा पहिरो खसेको छ । उक्त सडकमा पहिरो खसे पनि जलविद्युत् योजनाको काम चलिरहेकाले कम्पनीले तत्काल सडक खुलाउने गरेको छ ।
