धार्मीक तथा पर्यटकीय गन्तव्य बडिमालिकामा यो वर्ष औपचारिक मेला नलाग्ने भएको छ। कोरोना संक्रमणको जोखिमलाई मध्येनजर गर्दै यो वर्ष अनिवार्य नित्य पुजा बाहेक अन्य कुनै औपचारिक मेला जात्रा नलाग्ने जिल्ला प्रशासन कार्यालय बाजुराले जनाएको छ।
जिल्ला प्रशासन कार्यालय बाजुराले सार्वजनिक सूचना जारी गर्दै बडिमालिका मन्दिरमा जनैपूर्णिमाको अघिल्लो दिन लाग्ने मेला नगर्ने निर्णय गरिएको छ।
प्रमुख जिल्ला अधिकारी एवं सुरक्षा समिति संयोजक गोपालप्रसाद अधिकारीको अध्यक्षतामा बसेको बैठकले यो वर्ष साउन र भदौमा लाग्ने स्थानीय चाड पर्वपनि नगर्न र नगराउन आग्रह गरेको छ।
कोरोना संक्रमणको जोखिम बढेको र संक्रमणले तिब्र रुप लिने अवस्था देखिएकोले कुनैपनि मेला पर्व र चाडवाड नमनाउन स्थानीयलाई अपिल गरेको छ। बडिमालिका मन्दिरमा यो वर्ष भदौ ५ गते मेला लाग्ने थियो।
भदौ ६ गतेको जनैपूर्णिमा सम्वद्ध मेलाहरु पनि रोक्न आग्रह गरेको छ। प्रमुख शक्तिपीठहरुमा अनिवार्य देवीको पूजा र नित्य कर्मका लागि पुजारी सम्बद्ध केही व्यक्ति बाहेक अरु कुनैको उपस्थिति नहुने गरि व्यवस्थापन गर्न आग्रह गरेको छ।
जनैपूर्णिमाको अघिल्लो दिन बडिमालिका सहीत बुढीनन्दा, बढालेक, दुनालेक, डुडुल्ली सहीतका डेढ दर्जन शक्ति पीठमा मेला लाग्ने गरेको छ। यो वर्ष भने कोरोनाकै कारण कुनै शक्तिपीठमा पनि पुजा बाहेक मेला आयोजना नगर्न पत्राचार गरिएको छ।
बडिमालिका समुद्रीसतह बाट ४ हजार २ सय १६ मिटर उचाईमा रहेको छ। बडिमालिका पुग्न तीर्थालहरुले मार्तडीबाट तीन दिन लाग्ने गरेको छ।
पूजा आजाको परम्परा अनुसार छिमेकी जिल्लाहरू अछाम, डोटी, जुम्ला र कालिकोटबाट सरकारी टोली पुजासहितका तीर्थयात्री यसअघि नै बडीमालिका प्रस्थान हुने गरेका छन्। डोटी र जुम्लाबाट टोली आइसकेका छन्।
सरकारी टोली डोटीबाट १२ र जुम्लाबाट १० दिन पूर्व नै प्रस्थान गर्ने धार्मीक मान्यता छ। अछामको वैद्यनाथबाट समेत त्यस क्षेत्रमा फलेको धानको बाला बडीमालिकामा चढाउने परम्परा अनुसार एक टोली १० दिनअघि प्रस्थान गरिसकेको छ।
बडीमालिका माईको दर्शनका लागी विशेष गरी बाजुरा ,बझाङ्ग, अछाम, डोटी, डडेल्धुरा, बैतडी, हुम्लाबाट तिथार्लु पुग्ने गर्दछन् । काठमाडौं, भारतको गडवाल लगायतका ठाउँबाट पनि दर्शनार्थी आउने गरेको मेला व्यवस्थापन समितिले जनाएको छ।