कैलालीको घोडाघोडी नगरपालिका ११ जवलपुर खोपा नालामा निर्माण सम्पन्न भएको १५ दिनमै कल्भर्ट चर्किएको भन्दै स्थानीय आक्रोशित भएका छन् ।
नगरपालिकाको साढे ७ लाख बजेटमा निमार्ण भएको कल्भर्ट सञ्चालनमा नआउँदै चर्किए पछि स्थानीयहरूले निर्माणमा कमसल सामाग्रीको प्रयोग र भ्रष्टाचार भएको आरोप लगाएका छन् ।
नगरपालिकाको अनुगमन समितिले कार्यप्रगती राम्रो भएको प्रतिवेदन पेस गरेपछि उक्त आयोजनाको भुक्तानी समेत भइसकेको छ । स्थानीयहरूले कल्भर्टको पुनः अनुगमन हुनुपर्ने माग गरेका छन् ।
उपभोक्ता समिति अध्यक्ष राम कुमार चौधरीले कल्भर्ट नचर्किएको दाबी गरेका छन् । गुणस्तरीय सामाग्रीको प्रयोग गरी निर्माण सम्पन्न गरिएकाले कल्भर्ट दिगो रहने उनले बताए । ‘नगरपालिकाबाट एक लाख रकम काटिदा पनि हामीले कुनै कमजोरी नगरेर काम गरेका छौँ,उनले भने,‘यसमा कुनै पनि प्राविधिक त्रुटि छैन।’
घोडाघोडी नगरपालिका वडा नंं.११ वडाध्यक्ष दानसिंह जोगीले कल्भर्ट चर्र्किएकोबारे कुनै सूचना नआएको बताए ।
‘मलाइ कुनै जानकारी छैन,उनले भने,‘तपाइले भने पछि मैले निर्माण समिति अध्यक्षलाई बुझन निर्देशन दिएको छु,मङ्गलवार म आफै गएर पछि अनुगमन गर्छु।’
