धनगढी, ८ माघ २०८२
सुदूरपश्चिम प्रदेश र स्थानीय तहमा कार्यरत अधिकृत स्तरका कर्मचारीहरूको कार्यक्षमता अभिवृद्धि गर्ने उद्देश्यले आयोजित ३५ कार्यदिने सेवाकालीन प्रशिक्षण बिहीबार धनगढीमा सम्पन्न भएको छ। सुदूरपश्चिम प्रदेश अनुसन्धान तथा प्रशिक्षण प्रतिष्ठान (पुन्ना, डोटी) को आयोजनामा सञ्चालित यो प्रशिक्षणको समापन पशुपंक्षी रोग अन्वेषण प्रयोगशाला (पशु सेवा तालिम केन्द्र) को हलमा भव्यताका साथ सम्पन्न भएको हो।
गत मंसिर २५ गतेदेखि सुरु भएको यस गहन प्रशिक्षणमा प्रदेश र विभिन्न स्थानीय तहमा कार्यरत अधिकृत स्तर सातौँ र आठौँ तहका २९ जना कर्मचारीहरू सहभागी थिए। ३५ दिनसम्म चलेको यस सत्रमा “कार्यसम्पादन, विकास व्यवस्थापन तथा सेवा प्रवाह” का विभिन्न आयामहरूमा विस्तृत छलफल र सीप हस्तान्तरण गरिएको थियो।
कार्यक्रमका प्रमुख अतिथि एवं सामाजिक विकास मन्त्रालयका सचिव डा. हेमराज रेग्मीले सहभागीहरूलाई बधाई दिँदै तालिमको सार्थकता कार्यथलोमा देखिनुपर्नेमा जोड दिनुभयो। “तालिममा सिकेका ज्ञान र सीपलाई केवल प्रमाणपत्रमा सीमित नराखी व्यवहारमा प्रयोग गर्नुपर्छ,” उहाँले भन्नुभयो, “यसले प्रदेशको कार्यसम्पादन र सेवा प्रवाहमा सकारात्मक परिवर्तन ल्याउने विश्वास मैले लिएको छु।”
कार्यक्रममा प्रतिष्ठानका कार्यकारी निर्देशक श्री गेहेन्द्र बमले यो प्रशिक्षणको उद्देश्य कर्मचारीहरूलाई केवल सैद्धान्तिक ज्ञान दिनु मात्र नभई उनीहरूमा नेतृत्व सीप, सकारात्मक सोच, र सदाचारको विकास गर्नु रहेको बताउनुभयो।
निर्देशक बमले भन्नुभयो, “सहभागीहरूलाई सार्वजनिक खर्च व्यवस्थापन, सङ्घीय शासन प्रणाली, योजना तर्जुमा र कानुन निर्माण जस्ता विषयमा निपुण बनाइएको छ। कर्मचारीहरूमा रहने द्वन्द्व व्यवस्थापन, अन्तरवैयक्तिक सम्बन्ध र तनाव व्यवस्थापनका सीपले कार्यालय सञ्चालनलाई थप आधुनिक र जनमुखी बनाउन सहयोग पुग्नेछ।” उहाँले सहभागीहरूले तयार पारेको कार्ययोजनालाई आफ्नै कार्यक्षेत्रमा लागू गर्न समेत आग्रह गर्नुभयो।
प्रतिष्ठानले अधिकृत स्तर (सातौँ/आठौँ) का कर्मचारीहरूका लागि आयोजना गरेको यो तेश्रो सेवाकालीन प्रशिक्षण हो। यसअघिका दुईवटा ब्याचले पनि सफलतापूर्वक तालिम सम्पन्न गरिसकेका छन्।
यस प्रशिक्षणले सुदूरपश्चिम प्रदेशको प्रशासनिक संयन्त्रलाई थप जिम्मेवार, पारदर्शी र परिणाममुखी बनाउन महत्त्वपूर्ण भूमिका खेल्ने सहभागीहरूले महसुस गरेका छन्।
