बैतडी। बैतडीको दुर्गम क्षेत्र सुर्नया गाउँपालिका बाट प्रदेश राजधानी धनगढी सम्म अब मात्र ७ सय रुपैयाँ भाडा मा यात्रा गर्न पाइने भएको छ। यात्रुहरूको सुविधा र पहुँचलाई मध्यनजर गर्दै खप्तड यातायात प्रालि ले इलेक्ट्रोनिक भ्यान (ईभी) गाडीमार्फत नियमित सेवा सञ्चालन गरेसँगै भाडा दरमा उल्लेख्य कमी आएको हो।
खप्तड यातायात प्रालिले हाल दुई वटा ईभी गाडी मार्फत दैनिक दोहोरो सेवा सञ्चालन गरिरहेको छ। सुर्नयाको सन्सेरीमाण्डौबाट बिहान ७ बजे र कैलालीको अत्तरीयाबाट बिहान ८ बजे गाडी छुट्ने व्यवस्था गरिएको ईभी गाडी सञ्चालक चन्द्रसिंह कुवँर ले जानकारी दिए।
उनका अनुसार केही महिना अघि सुरु गरिएको यो सेवा यात्रुहरूको आर्थिक भार घटाउने र सुरक्षित तथा सहज यात्रा उपलब्ध गराउने उद्देश्यले भाडा दर घटाइएको हो। यसअघि सुर्नयाबाट धनगढी पुग्न १५ सय रुपैयाँसम्म भाडा तिर्नु पर्ने बाध्यता रहेकोमा अहिले आधाभन्दा कम भाडामा यात्रा गर्न पाइने भएपछि यात्रुहरू उत्साहित भएका छन्।
खप्तड यातायात प्रालिका अनुसार ८० वर्षभन्दा माथिका ज्येष्ठ नागरिकलाई १० प्रतिशत छुट तथा ९० वर्षभन्दा माथिका ज्येष्ठ नागरिकलाई पूर्ण रूपमा निःशुल्क यात्रा को व्यवस्था गरिएको छ। यसले दुर्गम क्षेत्रका ज्येष्ठ नागरिकलाई विशेष राहत पुगेको महेश कुवँर ले बताए।
भाडा दर घटेसँगै सुर्नयाबाट प्रदेश राजधानी धनगढी आवत–जावत गर्ने यात्रुहरूलाई ठूलो राहत मिलेको छ। लामो समयदेखि महँगो भाडा तिर्न बाध्य सुर्नयाबासीहरू अहिले सस्तो, सुरक्षित र वातावरणमैत्री ईभी सेवाबाट लाभान्वित भएका छन्।
