टिकापुर-कैलालीमा अक्सिजन ग्यास अभाव भइृरहेको बेला लम्कीमा रहेको किसान बहुउद्देश्यीय सहकारी संस्थाले टीकापुर अस्पताललाई १०० सिलिन्डर अक्सिजन रिफिल गरेर हस्तान्तरण गरेको छ ।
संस्थाका सञ्चालक समिति सदस्य सरोजकुमार शाहले अस्पतालका डाक्टर रमेश उपाध्यायलाई सिलिन्डर हस्तान्तरण गरेको किसान बहुउद्देश्यीय सहकारी संस्थाका प्रोजेक्ट मेनेजर दिपकराज ढङ्गानाले बताए ।
किसान सहकारीले कोभिड–१९ को दोस्रो भेरियन्टबाट प्रताडित बिरामीहरुलाई सहज रुपमा अक्सिजन आपूर्तिका लागि किसान अक्सिजन बैंक सञ्चालनमा ल्याई उक्त बैंकमार्फत सेती प्रादेशिक अस्पताल धनगढी, टीकापुर अस्पताल र लम्की अस्पताललाई अक्सिजन आपूर्ति गर्दै आएको सञ्चालक समिति सदस्य शाहले बताए ।
सोमबारसम्म टीकापुर अस्पताललमा अक्सिजन आवश्यक भएका ३२ जना कोभिडका बिरामीको उपचार भईरहेको अस्पतालले जनाएको छ ।
सहकारी संस्थाले सञ्चालन गरेको अक्सिजन बैंकले यसअघि लम्की अस्पताललाई १५० थान रिफिल सिलिन्डर उपलब्ध गराईसकेको छ ।स्थानीय अस्पतालहरुमा सिलिन्डर अभाव हुन नदिन संस्थाले अन्य संस्थासँगको सहकार्यमा खाली सिलिन्डर खरिद प्रक्रिया अघि बढाएको संस्थाका महाप्रवन्धक डम्बरबहादुर शाहले जानकारी दिए ।
