धनगढी – शुक्रबार देखि तनाबग्रस्त बनेको धनगढीको नोभा अस्पतालमा विवाद कायमै रहेको छ । शुक्रबार कञ्चनपुरको बेलौरीका १७ वर्षीय नसिब चौधरीको अस्पतालमा मृत्यु भएपछि सूरु भएको विवाद अझै कामयमै रहेको हो ।
साउन ७ गते सामान्य अवस्थामा ल्याइएका चौधरीको अस्पतालको लापरवाहीका कारण मृत्यु भएको भन्दै आक्रोशित आफन्तले अस्पतालमा ढुंगामुढा प्रहार गर्दै तोडफोड गर्ने प्रयास गरेका छन ।
प्रहरीले स्थिती नियन्त्रणमा लिन तीन राउण्ड अश्रुग्यास प्रहार गरेको छ । जिल्ला प्रहरी कार्यालयका प्रमुख प्रहरी उपरीक्षक एसपी पदमबहादुर बिष्ट अस्पताल बाहिर भेला भएका आफन्तले ढुंगामुढा गर्न थालेपछि स्थिती नियन्त्रणमा लिन अश्रुग्यास प्रहार गरिएको बताए । उनले अहिले अस्पतालले मृतक पक्षसँग वार्ता गरिरहेको बताए ।
मृतकका आफन्तले विरामीको अवस्था जटिल बन्दा समेत अन्यत्र रेफर नगरेको बताएका छन । शुक्रबार अन्तिम समयमा आएर मात्र अस्पतालले नेपालगञ्ज वा भारतको बरेली लैजान भनेको मृतकका मामा रामकृष्ण चौधरीले बताएका छन ।
शुक्रबार दिउँसो साढे ३ बजे नेपालगञ्ज लैजान एम्बुलेन्समा राख्ने क्र्रममा चौधरीको मृत्यु भएको थियो । आफन्तले अस्पतालको लापरवाहीका कारण उनको मृत्यु भएको भन्दै शव बुझ्न मानेका छैनन् भने डाक्टरलाई कारवाही र क्षतिपूर्तिको माग गरेका छन् ।
अस्पताल प्रशासनले शुक्रबार साँझदेखि मृतकका आफन्तसँग वार्ता गरेपनि कुरा मिल्न सकेको छैन ।
आक्रोशित आफन्तले शुक्रबार पनि हस्पिटलको रिसेप्सनमा तोडफोड गरेका थिए । शुक्रबार पनि अस्पताल प्रशासन र आफन्त बिच बार्ता भएपनि बर्ता बिना निश्कर्ष टुङ्गीएको थियो ।
