धनगढी- कैलालीको गोदावरी नगरपालिकाले पछिल्लो ३ दिन अत्तरिया बजार र आसपासका अन्य बजारहरूमा अनुगमन गर्यो। खाद्य प्रविधि तथा गुण नियन्त्रण कार्यालय धनगढीसँगको समन्वयमा गरिएको सो अनुगमनबाट नगरपालिकाले करिब डेढ लाख बढीको अखाद्य वस्तु नष्ट गरेको जनाएको छ । नगरपालिकाले करिब एक वर्ष अघि अत्तरिया बजार वा आसपासका बजारहरूमा अनुगमन गरेको थियो । तर एक वर्षको अवधिमा बजारमा अधिकांश पसल, उद्योगमा एक वर्ष अघिका त्रुटि दोहरिएको पाइएको भए पनि त्यसको दोष ती व्यापारी, सञ्चालकलाई थुपार्दै अनुगमन टोलीले यस पटक पनि अनुगमन सम्पन्न गरेको छ ।
गोदावरी नगरपालिकाकी उपप्रमुख नेतृत्वको अनुगमनमा निकै लामो समय पछि भएको बजारमा अनुगमन अखाद्य बस्तु, म्याद नाघेका, उत्पादन उपभोग्य मिति नै नहालेका, अखाद्य क्यामिकल प्रयोग गरेका सामान छ्यापछ्याप्ती भेटिएका छन् । तर, अनुगमन टोलीले भने पुरानै शैलीमा सम्झाउँदै बुझाउँदै केही सामान जफत गरेर उपभोक्ताको स्वास्थ्य माथि खेलबाड गर्नेलाई उन्मुक्ति दिने काम यस पटक पनि दोहरिएको छ ।
नियमित अनुगमन नै नगर्ने, अनुगमन गरे पनि प्रक्रिया पुगाउने मात्रै झारो टार्ने प्रवृतिले उपभोक्ताको स्वास्थ्यमाथि भने गम्भीर खेलबाड हुँदै आएको छ । गोदावरी नगरपालिकाले बनाएको बजार अनुगमन निर्देशिका २०७५ मा मासिक रूपमा योजना बनाई अनुगमन गर्नुपर्ने उल्लेख छ । तर, उक्त निर्देशिका लत्याउँदै वर्षमा एक दुई पटक मात्रै अनुगमन हुँदै आएको छ । अनुगमन गरिएको समयमा छ्यापछ्याप्ती अखाद्य बस्तु भेटिदा पनि त्यसलाई नियन्त्रण गर्न नियमित अनुगमन गर्नुपर्नेमा कहिले समय नभएको, कहिले बजेट नभएको भन्दै अनुगमन गर्नबाट पन्छिने गरिएको छ ।
अत्तरिया बजार सुदूरपश्चिमका नौ जिल्लाकै संगम स्थल भएकाले नियमित उपभोक्ता भन्दा कहिले काही आउने जाने बढी हुन्छन् । चारैतिर राजमार्गले जोडिएको बजारमा अखाद्य बस्तुको बिक्री हुने जोखिम बढी भए पनि यहाँ अनुगमनमा भने बेवास्ता गरिँदै आएको छ ।
अनुगमन नागरिकको स्वास्थ्य सँग जोडिएको विषयवस्तु हो । बजारमा बेचिने अखाद्य वस्तुहरूले नागरिकको स्वास्थ्यमा गम्भीर समस्या पार्न सक्छ । तसर्थ त्यस्ता वस्तुहरूको बिक्रिवितरण रोक्ने सबैभन्दा महत्त्वपूर्ण उपाय भनेको अनुगमन हो । नगरपालिकाले नियमित अनुगमन गरेर त्यस्ता अखाद्य वस्तुहरू जफत गर्ने र त्यस्तो वस्तु बेच्ने व्यवसायीलाई कारबाहीको दायरामा ल्याउने कार्य गर्नुपर्छ ।
मानिसको स्वास्थ्यसँग जोडिएको विषयमा समय अभाव या अन्य बहाना बनाउन पाइँदैन । बजारमा एक वर्षको अवधिमा गरिएको छड्के अनुगमनमा करिब डेढ लाख बढीका अखाद्य सामग्री भेटिए । अझै केही गाउँका बजारहरूमा त अनुगमन हुनै सकेको छैन । एक पटकको अनुगमनले देखाएको यथार्थता बारम्बार दोहोरिँदा पनि अनुगमनमा नियमितता नहुनु सम्बन्धित सरोकारवाला निकायको कमजोरी नै हो । तसर्थ आफ्नो कमजोरीलाई सुधार गर्दै बजार अनुगमनलाई निरन्तरता दिन तिर ध्यान दिइनुपर्दछ ।
