काठमाडौँ । पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले समाजवादी क्रान्तिका लागि २५/३० वर्षको युवा जसरी देश दौडाहमा लागेको बताएका छन् । मध्यपहाडी लोकमार्ग अन्तर्गत आइतबार दैलेखको सदरमुकाममा आयोजित सभालाई सम्बोधन गरेका उनले बाँकी क्रान्ति पुरा गर्न आफूलाई साथ दिन अपिल गरे ।
‘हुन त यहाँ अन्य नेताभन्दा एक/दुई वर्ष जेठो छु । म ७० वर्ष नाघे पनि तपाईंले देख्नुभएको छ– २५/३० वर्षको जवान जसरी त्यसै दौडेको होइन । बाँकी क्रान्ति पुरा गर्ने उद्देश्यले दौडेको हो । त्यसैले हाम्रो अभियानलाई साथ दिन म अपिल गर्छु’, उनले भने ।
मजदुर, किसान, दलित, जनजाति, महिलाले अहिले जे जति अधिकार पाएका छन्, त्यो माओवादीका त्याग, तपस्या र बलिदानले पाएको प्रचण्डले दाबी गरे । तर अहिले यथास्थितिवादी र प्रतिगामीहरूले यसलाई खोस्न चाहेको भन्दै उनले सङ्घीय लोकतान्त्रिक गणतन्त्रको रक्षा गरेर अझ अगाडि बढाउन चाहेका बताए ।
त्यसका निम्ति निर्धक्क भएर टोल टोल र घरघरमा गएर जनतासँग यी कुरा बताइदिन अपिल गर्दै उनले भने– ‘आउने समयमा माओवादी बलियो हुँदा दलित बलियो हुनेवाला छन् । माओवादी बलियो हुँदा महिला बलियो हुनेवाला छन् । माओवादी बलियो हुँदा मजदुर र किसान बलियो हुनेवाला छन् । माओवादी बलियो हुँदा नेपाल बलियो हुनेवाला छ । त्यसकारण यो कुनै घमन्डको कुरा होइन । यो ऐतिहासिक तथ्य हो ।’
