एएफसी एसियन कप छनोट फुटबलको तेस्रो चरणमा बिहीबार नेपाली टोलीले बलियो प्रतिद्वन्द्वी भियतनामको सामना गर्दैछ । खेल नेपाली समयानुसार, साँझ १८स्१५ बजे भियतनामको हो ची मिन्ह सिटीमा शुरू हुनेछ ।

नेपाल र भियतनामबीच हालसम्म दुईपटक खेल भएको छ । यी दुवै खेल एसियन कपको छनोट प्रतियोगिताकै क्रममा सन् २००३ को सेप्टेम्बर र अक्टोबरमा खेलिएको थियो । दुवै खेलमा नेपाल पराजित भएको थियो ।

त्यतिबेला सेप्टेम्बर २७ तारिखमा खेलिएको पहिलो खेलमा भियतनामले नेपाललाई ५–० गोलको फराकिलो अन्तरले हराएको थियो । अक्टोबर २१ तारिखमा खेलिएको दोस्रो खेलमा पनि भियतनामले नेपाललाई २–० गोलले पराजित गरेको थियो । यी दुवै टोली २२ वर्षपछि फेरि आपसमा भिड्न लागेका हुन्, त्यो पनि एसियन कपकै छनोट प्रतियोगितामा ।

सन् २०२७ मा साउदी अरेबियामा आयोजना हुने एएफसी एसियन कपको १९औँ संस्करणका लागि यो छनोट प्रतियोगिता हो । नेपाल र भियतनाम छनोट प्रतियोगिताको समूह ‘एफ’मा रहेका छन् । उक्त समूहमा मलेसिया र लाओस पनि छन् ।

तेस्रो चरणको छनोट प्रतियोगितामा २४ राष्ट्रको सहभागिता रहेको छ । प्रत्येक समूहमा रहेका टोलीले ‘होम एन्ड अवे’ का आधारमा एक–अर्कासँग दुई–दुई खेल खेल्नेछन् । त्यसपछि प्रत्येक समूहमा पहिलो हुने टोली एसियन कपमा छनोट हुनेछन् ।

एसियन कप छनोटमा हालसम्म नेपाली टोलीको अवस्था सन्तोषजनक छैन । समूहका चारवटै टोलीले दुई–दुई खेल खेलिसक्दा नेपालले एक अंक पनि बटुल्न सकेको छैन । आफ्नो दुवै खेलमा पराजित भएको नेपाली टोली अंक तालिकामा सबैभन्दा तल छ ।

गत चैत १२ गते खेलिएको आफ्नो पहिलो खेलमा नेपाली टोली मलेसियासँग ०–२ गोलले पराजित भएको थियो । उक्त खेल मलेसियाको घरेलु मैदानमा खेलिएको थियो ।

यसैगरी, गत जेठ २७ गते खेलिएको आफ्नो दोस्रो खेलमा पनि नेपाली टोली तुलनात्मक रूपमा कमजोर प्रतिद्वन्द्वी लाओससँग १–२ गोलले पराजित भएको थियो । त्यो खेल पनि लाओसको घरेलु मैदानमा खेलिएको थियो । उक्त खेलमा नेपालका लागि एकमात्र गोल मनिष डाँगीले गरेका थिए ।

विश्व फुटबल महासंघ (फिफा)द्वारा घोषित पछिल्लो वरीयतामा नेपाली टोली लाओसभन्दा अगाडि छ । वरीयतामा नेपाल १७६औँ र लाओस १८५औँ स्थानमा छन् । मलेसिया र भियतनाम फिफा वरीयतामा नेपालभन्दा अगाडि छन् । पछिल्लो वरीयतामा भियतनाम ११४औँ र मलेसिया १२३औँ स्थानमा छन् ।

एसियन कप छनोटको समूह ‘एफ’ तालिकामा ६ अंकसहित मलेसिया पहिलो स्थानमा छ । मलेसियाले भियतनामलाई पनि ४–० गोलले हराएको थियो । दुई खेलबाट तीन अंक बटुलेको भियतनाम भने तालिकाको दोस्रो स्थानमा छ ।

तालिकाको तेस्रो स्थानमा आसिन लाओसले पनि दुई खेलबाट तीन अंक जोडेको छ । लाओसको टोली आफ्नो पहिलो खेलमा भियतनामसँग ५–० गोलले विजयी भएको थियो । तालिकामा सबैभन्दा तल रहेको नेपालले भने हालसम्म अंक बटुल्न सकेको छैन ।

भियतनाम भ्रमणका क्रममा नेपाली टोलीले दुई खेल खेल्नेछ । नेपाल र भियतनामबीचको दोस्रो खेल भने असोज २८ गते खेलिने छ । यो खेल नेपालको घरेलु मैदानमा खेलिनु पर्ने थियो ।

तर, नेपालको एकमात्र अन्तर्राष्ट्रिय फुटबल स्टेडियम ‘दशरथ रंगशाला’ लामो समयदेखि एसियाली फुटबल महासंघ ९एएफसी० को निलम्बनमा परेकाले नेपाल र भियतनामबीचको दोस्रो खेल पनि विपक्षीकै घरेलु मैदानमा खेलिन लागेको हो ।

त्यसैले भियतनाम विरुद्धको यी दुई खेल नेपाली टोलीका लागि निकै महत्वपूर्ण छ । भियतनाम भ्रमणमा पनि गतिलो प्रदर्शन गर्न नसके नेपाली टोलीको एसियन कप खेल्ने सपना चकनाचुर हुनेछ । नेपाली टोलीले अब भियतनाम विरुद्धको दुई खेलसँगै मलेसिया र आलोसँग पनि एक–एक खेल खेल्न बाँकी छ ।

भियतनामविरुद्ध खेल्ने नेपाली टोलीमा अभिषेक लिम्बु, अनन्त तमाङ, अञ्जन विष्ट, एरिक विष्ट, आयुष घलान, बिमल पाण्डे, विशाल सुनार (गोलरक्षक), दीप कार्की (गोलरक्षक) र दिनेश हेन्जन रहेका छन् ।

यसैगरी, जिलेस्पीजङ कार्की, किरणकुमार लिम्बु (गोलरक्षक), कृतिशरत्न छुन्जु, कुशल देउवा, लाकेन लिम्बु, मणिकुमार लामा, मनिष डाँगी, रोहित चन्द, रोहन कार्की, सनिश श्रेष्ठ, सुवाष ठकुरी बम, सुमित श्रेष्ठ, सुमन श्रेष्ठ र योगेश गुरुङ पनि टोलीमा छन् ।

नेपाली टोलीले हालसम्म एएफसी एसियन कप खेल्न सकेको छैन । सन् १९५६ देखि शुरू भएको एएफसी एसियन कप प्रत्येक चार वर्षमा आयोजना हुँदै आएको छ । शुरूआती संस्करणमा चारवटा टोलीले मात्र सहभागिता जनाएको एसियन कपमा पछिल्लो समय टोलीको सँख्या बढाएर २४ पुर्‍याइसकेको छ ।