कैलालीको धनगढी उपमहानगरपालिका क्षेत्रमा इजाजतपत्रबिना सञ्चालनमा रहेका क्लिनिक, फार्मेसी र प्रयोगशालामाथि स्वास्थ्य कार्यालय कैलालीले कडाइका साथ कारबाहीको चेतावनी दिएको छ।

स्वास्थ्य कार्यालय, प्रदेश प्रयोगशाला र धनगढी उपमहानगरपालिकाको स्वास्थ्य शाखाले बुधबार गरेको संयुक्त अनुगमनका क्रममा २२ वटा स्वास्थ्य संस्था जाँच गर्दा कयौं फार्मेसी, क्लिनिक र प्याथोलोजी दर्ताविहीन रूपमा सञ्चालन भइरहेको पाइएको हो।

अनुगमनका क्रममा कठरिया मेडिकल हल, गंगोत्री मेडिकल हल, नमुना प्याथोलोजी, सिद्धार्थ डायग्नोष्टिक, गरीमा पोलिक्लिनिक र सिटी पोलिक्लिनिक लगायतका संस्थामा कैफियत फेला परेको स्वास्थ्य कार्यालयका सूचना अधिकारी दिपक जोशीले जानकारी दिए।

जोशीका अनुसार, “केही संस्थाले इजाजतपत्र नलिई सेवा सञ्चालन गरिरहेका छन्। ती सबैलाई १५ दिनभित्र दर्ता र नवीकरण गर्न लेखित निर्देशन दिइएको छ।”स्वास्थ्य कार्यालयका प्रमुख रमेश कुँवरले गरीमा र सिटी पोलिक्लिनिकले मापदण्ड पूरा नगरी सेवा दिइरहेको पुष्टि गर्दै भने, “यी संस्थाहरूको फाइल परीक्षण भइरहेको छ। मापदण्ड पूरा नभए तत्काल बन्द गर्ने कार्य अघि बढाइनेछ।”

धनगढीमा पछिल्ला वर्षहरूमा स्वास्थ्य संस्था तीव्र गतिमा विस्तार भए पनि नियमन र निरीक्षणमा कमजोरीका कारण अवैध रूपमा सेवा प्रवाह गर्ने प्रवृत्ति बढ्दो रहेको सरोकारवालाको भनाइ छ।स्थानीय तह, स्वास्थ्य कार्यालय र जिल्ला प्रशासनबीचको समन्वय अभावले कानुन विपरीत सञ्चालनमा रहेका स्वास्थ्य संस्था नियन्त्रणमा आउन नसकेको आलोचना पनि भइरहेको छ।

स्वास्थ्य विज्ञहरूले दर्ता र मापदण्डबिना सञ्चालनमा रहेका क्लिनिक तथा फार्मेसीले बिरामीको स्वास्थ्य सुरक्षामाथि गम्भीर जोखिम सिर्जना गरेको चेतावनी दिएका छन्। उनीहरूले अवैध स्वास्थ्य संस्थामाथि तत्काल कडाइका साथ कारबाही गर्न सरकारसँग माग गरेका छन्।