धनगढी, २७ बैशाख – प्रहरी नायव महानिरीक्षक (डीआईजी) ओम बहादुर रानाले आज एक विशेष समारोहका बीच सुदूरपश्चिम प्रदेश प्रहरी प्रमुखको पदभार ग्रहण गर्नुभएको छ । संगठनको महत्वपूर्ण जिम्मेवारीसहित प्रदेशको सुरक्षा कमान्ड सम्हाल्न उहाँ धनगढी आउनुभएको हो ।
पदभार ग्रहणका क्रममा डीआईजी रानालाई सुदूरपश्चिम प्रदेश प्रहरी कार्यालयका सिनियर प्रहरी अधिकृतहरू, साथै नेपाल प्रहरी प्रदेश कार्यालय महेन्द्रनगर, कैलाली र कञ्चनपुर स्थित प्रहरी कार्यालयका कार्यालय प्रमुखहरू र अन्य प्रहरी कर्मचारीहरूले भव्य स्वागत गर्नुभएको थियो । नयाँ नेतृत्वलाई स्वागत गर्न उपस्थित अधिकारीहरूमा उत्साह र सकारात्मक ऊर्जा देखिन्थ्यो।
डीआईजी रानाको आगमनले सुदूरपश्चिम प्रदेशको शान्ति, सुरक्षा र सुव्यवस्थामा नयाँ गति मिल्ने विश्वास गरिएको छ। अनुभवी प्रहरी अधिकारीको रूपमा उहाँले यस क्षेत्रमा नागरिक केन्द्रित सेवा, अपराध नियन्त्रण र कानूनको प्रभावकारी कार्यान्वयन लाई उच्च प्राथमिकता दिने प्रतिबद्धता व्यक्त गर्नुभएको छ ।
सुदूरपश्चिमको भौगोलिक र सामाजिक विविधतालाई मध्यनजर गर्दै, उहाँको नेतृत्वमा प्रदेश प्रहरीले जनतासँगको समन्वयलाई बलियो बनाउँदै थप व्यावसायिक र प्रभावकारी सेवा प्रवाह गर्ने अपेक्षा गरिएको छ।
