सुदूरपश्चिम प्रदेशमा नेकपा एमाले ओली समूहले मुख्यमन्त्री त्रिलोचन भट्टको राजीनामा माग गरेका छन् ।शुक्रवार देखी सुरु भएको सुदूरपश्चिम प्रदेश सभाको बजेट अधिवेशनमा प्रदेश सभा सदस्य पठानसिंह बोहराले आफूहरू प्रतिपक्ष भएको भन्दै अलग्गै सिटको व्यवस्था हुनुपर्ने माग गरेका छन्।

सभामुख अर्जुन थापाले बैठक प्रारम्भ भएको घोषण गरे लगत्तै सांसद बोहराले सिटबाट उठेर सरकारबाट समर्थन फिर्ता लिइसकेको कुरा प्रदेश सभालाई समेत जानकारी गराइसकेको अवस्थामा सिटको व्यवस्थापन नगरेको भन्दै आक्रोश पोखे ।

‘नेकपा एमाले अब प्रतिपक्ष भएको छ,उनले भने,‘समर्थन फिर्ता लिइसकेकोपछि सरकार अल्पमत परेको छ।मुख्यमन्त्रीले नैतिकताको आधारमा राजीनामा दिनुपर्छ।’

यस्तै नेपाली काँग्रेसका संसदीय दलका नेता डा.रण बहादुर रावलले प्रदेश सरकारले जनमुखी बजेट ल्याउनुपर्ने सुझाव दिए ।
‘बजेट बिगतको जस्तो नहोस्,उनले भने,‘कम्तीमा लोककल्याणकारी बजेट ल्याउनुपर्छ।’

मन्त्रिपरिषद् बैठकको सिफारिसमा प्रदेश प्रमुख गङ्गाप्रसाद यादवले आजदेखि आठौँ तथा बजेट अधिवेशन आह्वान गरेका थिए ।प्रदेश सरकारले बजेट ल्याउनुभन्दा १५ दिन अगावै अगामी आर्थिक वर्षको नीति तथा कार्यक्रम ल्याउनुपर्ने प्रावधान भए पनि यस वर्ष राजनीतिक किचलोका कारण ढिलो गरी बजेट अधिवेशन आह्वान भएकाले ढिलाइ भएको छ।

तर, सरकारले अध्यादेशमार्फत आर्थिक कार्यविधि ऐन संशोधन गर्दै बजेट ल्याउनुभन्दा ७ दिन अगाडि नीति कार्यक्रम ल्याउनुपर्ने व्यवस्था गरेको छ। असार १ गते अगामी आर्थिक वर्षको बजेट ल्याउनुपर्ने संवैधानिक व्यवस्था छ।शुक्रवार बजेट अधिवेशनको पहिलो बैठक सकिएको छ ।

बजेट अधिवेशनको पहिलो दिन शुभकामना आदानप्रदान नै मुख्य विषय थियो । बजेट अधिवेशनको दोस्रो बैठक २३ जेठमा बस्ने छ ।