जल तथा मौसम पूर्वानुमान महाशाखाले अहिले देशभरको मौसम आंशिकदेखि सामान्य बदली भएको छ । पश्चिमी र स्थानीय वायुको प्रभावका कारण आज दिनभरजसो नै मौसम बदली रहने र देशका पहाडी क्षेत्रमा हल्का पानी पर्ने मौसमविदले बताएका छन् ।
आज राति पनि पहाडी क्षेत्रको मौसम आंशिकदेखि सामान्य बद्ली रहनेछ भने प्रदेश-१ का एकरदुई ठाउँमा मेघगर्जनसहित हल्का पानी पर्ने सम्भावना रहेको मौसमविद् मञ्जु बासीले बताए। भोलि पनि मौसम आंशिकदेखि सामान्य बदली भइ फाट्टफुट्ट पानी पर्ने उनले बताए ।
पर्सिदेखि भने प्रि-मनसुन थप सक्रिय हुने र देशका धेरै ठाउँहरुमा पानी पर्ने सम्भावना रहेको छ । मनसुन सुरु हुने समय नजिकिएकाले मौसमी गतिविधि पनि थप सक्रिय हुँदै जाने मौसमविद बासीको भनाइ छ ।
यसले गर्दा देशका धेरै ठाउँमा पानी पर्ने पूर्वानुमान गरिएको छ । नेपालमा जुन १० देखि मनसुन सक्रिय हुने गर्छ । यसपालिको मनसुनमा औसतभन्दा धेरै पानी पर्ने मौसमविदले बताएका छन् ।
