डडेल्धुरा – शनिबार मृत फेला परेकी डडेल्धुराको परशुराम नगरपालिकाका—८ जमरानी आधारभूत स्वास्थ्य ईकाइ केन्द्रमा कार्यरत २६ वर्षीया अस्मिता धामीको न्याय माग्दै पीडित पक्षले नगरपालिकालाई ज्ञापनपत्र बुझाएका छन्। सोमबार मृतका धामीका आफन्तले नगरप्रमुख भीमबहादुर साउँदलाई ६ बुँदे ज्ञापनपत्र बुझाएका हुन्।
हत्याराको सत्य तथ्य र निष्पक्ष छानबिन गर्न तथा हदैसम्मको कारबाहीका लागि सम्बद्ध पक्ष समक्ष पहल कदमी गर्नुपर्ने, पीडित परिवारलाई उचित राहतको व्यवस्था गरिनुपर्ने, पीडित परिवारको एकजना व्यक्तिलाई रोजगारीको ग्यारेन्टी गरिनुपर्ने माग आफन्तले राखेका छन्।
यस्तै, जमरानी आधारभूत स्वास्थ्य ईकाइ केन्द्रको नाम परिवर्तन गरी अस्मिता स्मृति आधारभूत स्वास्थ्य ईकाइ केन्द्र नामाकरण गरिनुपर्ने, पीडितको बालबालिकाहरूलाई मावि तहसम्मप्रति बालबालिका मासिक एक हजारका दरले छात्रवृत्तिको ग्यारेन्टी गरिनुका साथै उच्च शिक्षा निःशुल्क अध्ययनको ग्यारेन्टी गरिनु पर्ने, कोभिडसम्बन्धी स्वास्थ्य बीमा उपलब्ध गराउन नगरपालिकाले पहल गर्नुपर्ने माग पनि आफन्तले अघि सारेका छन्।
धामीको शव शनिबार परशुराम नगरपालिका–९ को हट्वानी सामुदायिक वनमा फेला परेको थियो। उनको वीभत्स हत्या गरिएको अवस्थामा शव फेला परेको स्थानीयले जिकिर गरेका छन्।
असार २ गते आधारभूत स्वास्थ्य ईकाइ केन्द्र जमरानीबाट कोरोनाको वचत खोप र स्वास्थ्य सामाग्री लिएर जोगबुडा अस्पताल पु¥याउन भनी निस्केकी अस्मिताको शव वनमा फेला परेको थियो। जोगबुढा अस्पतालमा शवको अहिले पोष्टमार्टम भइरहेको जिल्ला प्रहरी कार्यालय, डडेल्धुराले जनाएको छ।