बैतडी – भारतसँग सीमा जोडिएको बैतडीमा पाचौंपटक निषेधाज्ञा थप गरिएको छ। मंगलबार प्रमुख जिल्ला अधिकारी राजेन्द्रदेव पाण्डेयले आदेश जारी गर्दै निषेधाज्ञा असार मसान्तसम्म कायम रहने जनाएका छन्।
नेपाल सरकार मन्त्रिपरिषदको निर्णय, कोभिड १९ को संकट व्यवस्थापन सम्बन्धमा व्यवस्था गर्न बनेको अध्यादेश २०७८ को दफा ४ र स्थानीय प्रशासन ऐन २०२८ को दफा ६ उपदफा ३ ले दिएको अधिकार प्रयोग गरेर असार ३१ गतेसम्म निषेधाज्ञालाई निरन्तरता दिइएको जिल्ला प्रशासन कार्यालय बैतडीले जनाएको छ।
कोरोना भाइरसको संक्रमणदर घटेको भए पनि जोखिम कायमै रहेकाले केही खुकुलो गर्दै असार ३१ गतेसम्म निषेधाज्ञा लम्ब्याइएको हो। पछिल्लो पटक थप गरिएको निषेधाज्ञाको समय मंगलबार राति १२ बजे सकिएको छ।
निषेधाज्ञा खुकुलो भएसँगै बुधबारदेखि जिल्लाभरि सार्वजनिक सवारीसाधान तथा निजी गाडी स्वास्थ्य सुरक्षाका मापदण्ड पालन गरी सञ्चालनमा आएका छन्। सार्वजनिक सवारी तथा निजी गाडीमा सीट क्षमताभन्दा आधा यात्रु बोकेर बिहान ७ बजेदेखि साँझ ७ बजेसम्म सञ्चालन गर्न पाइने आदेशमा उल्लेख गरिएको छ।
सबै कार्यालयहरुले सार्वजनिक सेवा नियमित रुपमा प्रवाह गर्नुपर्नेछ भने सार्वजनिक सेवा प्रवाह गर्दा स्थानीय तहहरुको आलोपालो मिलाई तथा स्वास्थ्य सुरक्षाका मापदण्ड पालना गरि गर्नुपर्ने आदेशमा उल्लेख गरिएको छ। सबै प्रकारका पसलहरु बिहान ७ देखि साँझ ६ बजेसम्म सञ्चालन हुनेछन्। होटेल तथा रेष्टुराँहरुले होम डेलीभरी तथा टेक अवे सेवा सञ्चालन गर्न सक्नेछन्।
सबै प्रकारका सभा, सम्मेलन र गोष्ठीमा लगाएको रोक यथावत राखिएको छ। विवाह, ब्रतबन्धजस्ता धार्मिक कार्यमा बढीमा १० जना सहभागी गराएर मात्रै गर्न पाइने प्रमुख जिल्ला अधिकारीद्वारा जारी आदेशमा उल्लेख गरिएको छ। तर, भोज भतेर भने पूर्णरुपमा बन्देज गरिएको छ।
कोरोना भाइरसको दोस्रो लहरको रोकथाम तथा नियन्त्रणका लागि बैतडीका पहिलोपटक वैशाख २० गतेदेखि निषेधाज्ञा जारी गरिएको थियो। वैशाख २० देखि सुरु भएको निषेधाज्ञा जेठ २, जेठ ३ देखि १७ सम्म र जेठ १८ देखि जेठ ३१ र असार १ गतेदेखि असार १५ गतेसम्म निषेधाज्ञा थपिएको थियो।
