यस वर्षको बाढी, पहिरोबाट घरमा क्षति पुगेकालाई अस्थायी आवास निर्माणका लागि तत्कालै रकम पठाउने राष्ट्रिय विपद जोखिम न्यूनीकरण तथा व्यवस्थापन प्राधिकरणले जनाएको छ।
शुक्रबार राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता विश्वप्रकाश अर्यालले यस वर्ष मनसुनबाट प्रभावित भएकाहरूका लागि अस्थायी आवास बनाउन तत्कालै रकम पठाउने व्यवस्था मिलाइएको बताए।
उनले भने, ‘यो वर्षको मनसुनबाट क्षति भएको हकमा तत्कालै सम्बन्धित जिल्ला प्रशासन कार्यालयलाई पत्राचार गरेर लगत संकलन गर्न र घर क्षतिको विवरण पठाउन माग गरेका छौँ। त्यो प्राप्त हुन बित्तिकै अस्थायी आवासका लागि तत्कालै रकम पठाउने व्यवस्था मिलाइसकेका छौँ।’
उनले गत वर्षको मनसुनबाट क्षति भएका २० जिल्लाका ३ हजार ३ सय ४९ वटा घरहरू पुनर्निर्माण लागि १९ करोड ९७ लाख ७३ हजार ७५० रुपैयाँ प्रथम किस्ताबापत रकम सम्बन्धित जिल्ला विपद् व्यवस्थापनको कोषमा पठाएको पनि उनले जानकारी दिए।
उनले यस वर्ष जेठ २८ गतेसम्म शुरु भएको मनसुनका कारण देशभरका ३२ जिल्लामा प्रत्यक्ष प्रभाव परेको बताए। मनसुनबाट आएको विपत्तिबाट ३३ जनाको मृत्यु भएको, ३० जना बेपत्ता भएका र ३२ जना घाइते भएका प्रवक्ता अर्यालले बताए।
बाढीपहिरोबाट ४८३ निजी घरहरू पूर्ण रुपमा क्षति भएको, ११२ घरमा आंशिक क्षति भएको, ३६ सरकारी कार्यालयमा क्षति भएको तथा ६ वटा सामुदायिक विद्यालयको भवनमा क्षति पुगको उनले जानकारी दिए।
त्यस्तै २२ वटा झोलुङ्गे पुल, १३ वटा पक्की पुल, २ वटा वित्तीय संस्थाको भवनमा क्षति भएको पनि उनले बताए। विपदबाट प्रभावितहरूका लागि खोज, उद्धार, राहत तथा पुनर्स्थापनाका काम गरिएको उनले जानकारी दिए।
मौसम पूर्वानुमान महाशाखासँग समन्वय गरी विपद् आउनसक्ने ठाउँमा प्राधिकरणले पूर्वसुचना प्रणालीलाई चुस्त दुरुस्त राखिएको उनले बताए। ९ जिल्लाका ३६ पालिकाहरूमा प्रभावमा आधारित पूर्वसुचना प्रणाली जडान गरिएको पनि उनले उल्लेख गरे।
हाल सुनसरी, मोरङ, पर्सा, सिन्धुपाल्चोक, मकवानपुर, सिन्धुली, ललितपुर, तनहुँ, लमजुङ र बाजुराका सडकखण्डहरू अवरुद्ध भएका र सडक डिभिजन कार्यालय, स्थानीय तहहरूले सडक खुलाउने काम भइरहेको उनले बताए।
