धनगढी – धनगढी उपमहानगरपालिकाले मास्क लगाउनलाई अनिवार्य गरेको छ ।
निषेधाज्ञा खुकुलो भएसँगै उप–महानगरपालिकामा संक्रमणको जोखिम नबढोस् भन्दै उपमहानगरपालिकाले मास्कलाई अनिवार्य गरेको हो ।
कोरोनाको संक्रमण फैलिने क्रम नरोकिएकाले धनगढी उप–महानगरपालिकाले ‘कोभिड बिरुद्धको हाम्रो अभियान, अनिवार्य मास्कको प्रयोग नै जीवनको बरदान’ भन्ने नाराका साथ अनिवार्य मास्क अभियान शुरु गरेको उपमहानगरपालिकाका नगर प्रमुख नृपबहादुर वडले जानकारी दिए ।
अभियानको एक समारोहको आयोजना गर्दै नगर पमुख वडले मंगलवारबाट अभियान शुरु भएको घोषणा गरे । अभियानमा प्रहरी, प्रशासन, नेपाल रेडक्रस सोसाईटी र सामाजिक संघसंस्थाको साथ रहेको नगर प्रमुख वडले बताए ।
‘व्यापार ब्यावसाय खुले संगै बजारमा चहलपहल बढेको छ’ नगरप्रमुख वडले भने, ‘अब जोखिम घटाउने उपाय भनेको अनिवार्य मास्क लगाउने कुरा मात्रै हो ।’
अभियानलाई सहयोग गर्न नगरप्रमुख वडले सबैसँग आग्रह गरेका थिए । नगरप्रमुख वडले मास्क, सामाजिक दुरी लगायतका विश्व स्वास्थ्य संगठनले तोकेको मापदण्डलाई अपनाए मात्रै संक्रमण घटाउन सकिने बताए ।
धनगढी उपमहानगरपालिकाका उप–प्रमुख सुशीला मिश्र भट्टले कोरोना रोकथामकै लागि बाध्यकारी अभियान सुरु गरेको बताईन । कोरोनाको जोखिम अझै कायमै छ उप–प्रमुख भट्टले भनिन्, त्यसैले मास्क नछोड्न सबैमा अनुरोध गर्दछौं ।’
कैलालीका प्रमुख जिल्ला अधिकारी खगेन्द्र प्रसाद रिजालले अभियानलाई बेवास्ता गर्दै मास्क प्रयोग नगर्नेलाई प्रहरीले कार्वाही सम्म गर्न सक्ने बताए । पहिले सम्झाउने काम प्रहरीले गर्छ प्रमुख जिल्ला अधिकारी रिजालले भने, लापर्वाही गर्नेलाई कार्वाही गरिन्छ । धनगढी उप–महानगरपालिकाले मास्क खरिद गर्न नसक्ने, सामाुदायीक विद्यालयका बिद्यार्थीलाई निशुल्क मास्क उपलब्ध गराउने छ ।
