आन्तरिक र बाह्य पर्यटककै भरमा रहेका कतिपय होटलहरू कोरोना कहर र लामो निषेधाज्ञाका कारण चौपट भएका छन् । पछिल्ला वर्षहरूमा डल्फिन अवलोकन गर्न आन्तरिक पर्यटकहरू यहाँका मोहना, कन्द्रा र पथरैया नदी पुग्ने गरेका थिए ।
डल्फिन हेर्ने बहानामा घुम्न आउनेहरू टीकापुरको रमणीय पार्क र कर्णाली चिसापानीमा रमाउँथे । यसले टीकापुर र चिसापानी बजारमा चहलपहल बढाएको थियो । तर गत वर्षदेखि पर्यटक भित्रिने क्रम घट्दै गएपछि यहाँको पर्यटन व्यवसाय पनि प्रभावित भएको छ ।
वर्षायाममा नदीहरूमा नजिकबाट डल्फिन अवलोकन गर्न सकिन्छ । तर कोरोना संक्रमण जोखिमकै कारण यो वर्ष पनि यी क्षेत्र सुनसानजस्तै छन् । ‘यसपालि डल्फिन हेर्नेको संख्या विगतको तुलनामा शून्यजस्तै छ,’ स्थानीय भीम विकले भने, ‘आसपासका स्थानीयबाहेक बाह्य जिल्लाबाट पर्यटक डल्फिन देखा पर्ने नदी क्षेत्रमा आएका छैनन् ।’ टीकापुर पार्क पनि सुनसान छ । दिनहुँ करिब ४र५ सय मानिस पार्क घुम्न आउने गरे पनि गत वैशाख १५ देखि पर्यटकका लागि बन्द गरिएको पार्क अझै खुलेको छैन । ‘गत वर्ष लकडाउनपछि मंसिर १९ बाट पर्यटकका लागि पार्क खुलेको थियो । फेरि वैशाख १५ बाट बन्द भयो,’ टीकापुर पार्कका इन्चार्ज अर्जुन कुँवरले भने, ‘कोरोनाका कारण पार्क बन्द नभएको भए प्रवेश शुल्कबाट मात्रै ६० लाखसम्म राजस्व संकलन हुन्थ्यो । यस वर्ष २१ लाखमै सीमित भयो ।’
पूर्वपश्चिम राजमार्गसँग जोडिएको कर्णाली चिसापानी पुलमा पनि वर्षभरि नै आन्तरिक पर्यटकको भीडभाड भइरहन्थ्यो । पुल क्षेत्रको दृश्यावलोकन, पिकनिक, शैक्षिक भ्रमण, कर्णालीको माछा खान र रमाइलोका लागि घुमफिर गर्न आउनेहरूको संख्या अहिले निकै कम छ । सेल्फी खिच्ने युवापिढीका लागि कर्णाली पुल आकर्षक गन्तव्यका रूपमा रहे पनि सार्वजनिक यातायात ठप्प हुँदा सुनसान जस्तै बनेको हो । जसका कारण यहाँको होटल व्यवसाय धराशायी बनेको व्यवसायीहरू बताउँछन् । ‘कर्णाली चिसापानीदेखि भारतको बोर्डरसम्मै कर्णाली किनार घुम्नलायक छ । तर कोरोनाका कारण यो वर्ष पूरै प्रभावित बन्यो,’ होटल सिद्धार्थ कर्णाली चिसापानीका व्यवस्थापक छत्र बोगटीले भने, ‘गत वर्ष कोरोना कहर कम भएपछि पर्यटक आउन थालेका थिए । तर दोस्रो लहर सुरु भएयता फेरि समस्या भयो ।’
गत वैशाख १ मा कर्णाली पुलमा आन्तरिक पर्यटकको भीडले सवारीसाधन आउजाउमै कठिनाइ उत्पन्न भएको उनले सुनाए । र्याफ्टिङको सिजन यही हो तर कोरोनाले पाहुना नै नआउने गरेको बताउँछन् कर्णाली र्याफ्टिङ तथा एड्भेन्चरका सञ्चालक विष्णुप्रसाद जैशी । ‘कर्णालीमा र्याफ्टिङ सुरु भएर पर्यटकीय सम्भावनाको खोजी गरिएपछि आन्तरिक पर्यटक पनि बढ्दै गएका हुन् ।
तर कोरोनाले सबैतिर बन्द भयो । पर्यटक नै आउँदैनन् ।’ हुलाकी सडकमा रहेको कर्णाली पुलमा पनि पर्यटकको चहलपहल हुन्थ्यो । तर अहिले व्यवसायीहरू नै संकटमा पर्न थालेको हुलाकी सडक किनारमा रहेको जितु कटेजका सञ्चालक जितराम चौधरीले बताए । ‘यहाँ आउने पर्यटक कर्णालीको माछाको स्वाद नलिई फर्कंदैनन् । तर कोरोनाले मान्छेको आउजाउ नै कम भएको छ । हामी होटल व्यवसायी पनि मारमा परेका छौं,’ उनले भने ।