कोरोना संक्रमणको चेन ब्रेक गर्न वैशाख २५ गतेदेखि दार्चुलामा जारी गरिएको निषेधाज्ञा हटेको छ । जिल्ला कोभिड–१९ व्यवस्थापन समितिको बैठकले जारी निषेधाज्ञा शुक्रबारदेखि खुला गर्ने निर्णय गरेको हो । जिल्ला प्रशासनले यसअघि लगाइएको असार मसान्तसम्मको निषेधाज्ञा बिहीबार सकिएको थियो । कोभिड–१९ व्यवस्थापन समितिको बैठकले जनजीवन सामान्य बनाउन स्वास्थ्य सुरक्षा मापदण्डको पूर्णरूपमा पालना गरेर निषेधाज्ञा खुला गरिएको प्रमुख जिल्ला अधिकारी सिद्धराज जोशीले बताए ।
संक्रमण देखिएका स्थानीय तहमा सोही स्थानीय तहले निषेधाज्ञा लगाउन सक्नेछन् । स्थानीय तहले ठाउँ विशेष निषेधाज्ञा लगाउन सिफारिस आए प्रशासनले सोही ठाउँमा निषेधाज्ञा लगाउने निर्णय गरिएको प्रजिअ जोशीको भनाइ छ । ‘भारतसंँग सीमा जोडिएका झोलुंगे पुल स्थानीय तहले एन्टिजेन परीक्षण गर्ने प्रतिबद्धता गरे मात्र सीमाना खोल्न सकिनेछ,’ प्रजिअ जोशीले भने, ‘जिल्लामा निषेधाज्ञा खुला भए पनि संक्रमण कायमै रहेकाले थप जोखिम बढ्न सक्ने देखिएकाले सतर्क रहन आवश्यक छ ।’
बुधबार बसेको बैठकले जिल्लाभित्र सञ्चालन हुने प्रत्येक सार्वजनिक सवारीसाधनहरूले अनिवार्य रूपमा सम्बन्धित समितिबाट प्रमाणित गरेको भाडा दररेट यात्रुहरूले देखिने गरी टाँस्नुपर्ने तथा सो नटाँसेको पाइएमा सम्बन्धित सवारीसाधनलाई कारबाही हुने जनाएको छ । यसैगरी, बैठकले शैक्षिक संस्थाहरू विद्यालय, कलेज, ट्युसन सेन्टर, तालिम केन्द्र अहिलेलाई निषेधाज्ञाकै अवस्थामाझैं अर्को व्यवस्था नभएसम्मका लागि बन्द रहने कोभिड–१९ व्यवस्थापन समितिले जनाएको छ । जिल्लामा हाल सक्रिय कोरोना संक्रमित १२ जना छन् ।