कञ्चनपुरमा निषेधाज्ञा खुकुलो भएसँगै लापरबाही पनि बढ्न थालेको छ । जिल्ला प्रशासन कार्यालयले लागू गरेको निषेधाज्ञाको पालनादेखि स्वास्थ्य सुरक्षाका मापदण्ड पालनामा लापरबाही बढ्न थालेको हो ।
जसका कारण कोरोना संक्रमण पनि बढ्न सक्ने जोखिम देखिएको छ । प्रशासनले बजार व्यवसाय बिहान ६ देखि साँझ ६ सम्म मात्रै खोल्न पाउने जनाएको छ । तर होटल, रेस्टुरेन्टलगायत स्थानमा ६ बजेपछि नै भीडभाड बढ्ने गरेको छ । व्यवसायीहरूले सटर बन्द गरेरसमेत अबेर रातिसम्म ग्राहक भर्ने गरेका छन् । उक्त क्षेत्रमा स्वास्थ्य सुरक्षाका मापदण्ड पालना कसैले पनि गर्दैनन् ।
यति बेला सरकारी कार्यालयदेखि बजारमा सर्वसाधारणको भीड निकै बढेको छ । उक्त क्षेत्रमा समेत मास्क र सेनेटाइजरलगायतको प्रयोग गरिएको देखिँदैन । ‘फेरि जोखिम निम्तिन सक्छ, सबैले लापरबाही गर्न थाले,’ जिल्ला स्वास्थ्य कार्यालयका जनस्वास्थय निरीक्षक सिद्धराज भट्टले भने, ‘केही दिनयता जिल्लामा संक्रमण दर पनि बढेको देखिन्छ ।’
जिल्ला स्वास्थ्य कार्यालयका अनुसार सक्रिय संक्रमितको संख्या ९० बाट बढेर करिब डेढ सय पुगेको छ । गत साता एकै दिन ४४ जनामा संक्रमण पुष्टि भएपछि सक्रिय संक्रमितको संख्या बढेको हो । शनिबार जिल्लामा ३ जनामा संक्रमण पुष्टि भएको स्वास्थ्य कार्यालयले जनाएको छ ।
प्रशासनले सबै क्षेत्रमा स्वास्थ्य सुरक्षाका मापदण्ड कडाइका साथ पालना गराउने भने पनि सरकारी कार्यालयमै यसको पालना हुन सकेको छैन । खासगरी बढी भीडभाड हुने विद्युत् प्राधिकरण, मालपोत, आन्तरिक राजस्व कार्यालय, यातायात व्यवस्था कार्यालय, बैंक तथा वित्तीय संस्थाहरू र जिल्ला प्रशासन कार्यालयलगायतका स्थानमा भीडभाड बढेको छ ।
