सरकारले तीन बुँदे सहमति कार्यान्वयन नगरे फेरी संघर्षमा जाने विप्लव नेतृत्वको नेपाल कम्युनिष्ट पार्टीका केन्द्रीय सदस्य ओम प्रकाश पुनले चेतावनी दिएका छन्।
विप्लव नेतृत्वको नेपाल कम्युनिष्ट पार्टी नेकपाले कैलाली जिल्ला समितिको साउन १, २ र ३ गते सम्पन्न १३ औँ पूर्ण बैठकको निर्णय मंगलवार पत्रकार सम्मेलन गरि सार्वजनिक गर्दै पुनले यस्तो चेतावनी दिएको हो। यस अघिको केपी ओली सरकारको नेतृत्वले दुई बुँदा कार्यान्वय नगरेपनि एक बुँदामा अझै कार्यान्वयन नभएकाले कार्यान्वयनका लागि छलफल भईरहेको बताए।
उनले आफ्ना कार्यकर्ता रिहाई र राजबन्दी परिवारको बारेमा केपी ओली सरकारसँग भएको सहमति कार्यान्वयन नभएको बताए। उनले सरकारले यो बुँदा कार्यान्वयन नगरे शान्तिपूर्ण संघर्षको यात्रा सुरु हुने चेतावनी दिए।
‘हाम्रो पार्टीले हत्या र हिंसाको नभएर क्रान्तिको बाटो रोजेको हो’, केन्द्रिय सदस्य तथा जिल्ला ईन्चार्ज ओम प्रकाश पुनले भने, ‘राज्य अहिलेपनि हाम्रो सिद्धान्त विपरित छ ।’ ‘बाध्यात्मक परिस्थितिका कारण सरकारले लगाएको प्रतिबन्धको प्रतिरोधमा हिँडेका थियौँ र अहिले राज्यकै आवश्यकता र बाध्यता र आफुहरुको सचेतता र आवश्यकताका कारण प्रतिबन्ध फुकुवा भयो तर सहमति कार्यान्वयन भएन’, उनले भने। कैलालीमा १, बैतडीमा १, बझाङमा १ र अछाममा १ गरी देशभरका विभिन्न कारागारमा रहेका आफ्ना साथिहरुको रिहाईको माग राख्दै पुनले सहमती कार्यान्वयन नभए संघर्षको बाटोमा जाने चेतावनी समेत दिएका छन्।
बैठकले सार्वजनिक गरेको निर्णयमा मुख्यतया नेपाल सरकार र नेकपा विप्लवबीच भएको सहमति कार्यान्वयन, वैज्ञानिक समाजवादका लागि जनमत संग्रह तथा विभिन्न निर्णयहरुलाई महत्व दिईएको छ ।
प्रतिबन्ध फुकुवा प्रश्चात भएका कयौँ राजनीतिक अवस्थालाई केन्द्रित गर्दै सर्वसाधरणको माग र देशको निकासप्रति सार्वजनिक महत्वका ९ बुँदे माग तथा निर्णय सार्वजनिक गरिएको जिल्ला समिती कैलालीका सचिव दिपेन्द्र चलाउनेले जानकारी दिएका छन्।
