धनगढी उप—महानगरपालिका वार्डनं १५ का तीन चार टोलका करिब एक सय घर नदी कटानको जोखिममा परेकाछन् । हरेक वर्ष खुटिया नदीको कटानका कारण नदी छेउछाउनका ती टोल कटानको उच्च जोखिममा रहेकाछन् । धनगढी उप—महानगरपालिका १५ का तरबरिया,सुर्मि झिनुवा र बसन्त टोलका करिब एक सय घर कटानको उच्च जोखिममा रहेको वार्ड अध्यक्ष फूलराम चौधरीले बताए ।
ती टोलमा करिब ३०० घर धुरी रहेकाछन् । जसमध्य करिब एक सय घरधुरी प्रभावित भएकाछन् । भने करिब ५० विगाह भन्दा बढी खेतीयोग्य जमिन कटानको खतरा रहेको छ । हरेक वर्ष खुटिया नदीमा आउने बाढीले खुटिया जमिन कटान तिब्ररुपमा गर्ने गरेको छ । आफू निर्वाचित भएर आएदेखिनै खुटिया नदीमा तटबन्धको माग गरेपनि सरोकारवाला निकायले सुनुवाई नगर्दा समस्या भोग्नु परेको अध्यक्ष चौधरीको भनाई छ ।
वार्डको बजेटले नदीमा तटबन्ध सम्भावना नभएकाले संघीय सरकार र प्रदेश सरकारका निकायलाई गुहार्नुपर्ने अवस्था छ तर हाम्रो आवाज कसैले नसुन्दा जनताले सास्ती भोग्नुपर्ने अवस्था आएको छ । नदी कटानले तिब्ररुप लिएकाले स्थानीय बासिन्दा आतंकित हुने थालेकाछन् । खुटियाले कटान गर्दै पूर्वतिर सर्दै गएकोले आफूहरु विस्थापित हुनुपर्ने होकी भन्ने चिन्ता लागेको तरबरिया टोलका स्थानीय बासिन्दा रामप्रसाद चौधरीले बताए ।
उनका अनुसार नदी बस्तीमा आउन करिब एक सय मिटर दूरीमात्र रहेको छ । कटान बढ्दै गएमा खुटिया नदी वस्तीमा पस्ने सम्भावना बढी भएकाले तत्काल नदीमा तटबन्धको काम गर्न स्थानीय बासिन्दाहरुको माग छ । समयमा खुटिया नदीमा तटबन्धको काम नभएमा सो क्षेत्रका करिब ३०० घरधुरी प्रभावित हुनसक्ने कुरालाई मध्यनजर राख्दै आफुले संघीय साँसद नारदमुनी रानासंग पनि तटबन्धको कुरा बारम्वार उठाएको वार्ड अध्यक्ष चौधरीले बताए ।
