दार्चुलाको व्यास गाउँपालिका- २ को मालघाटमा महाकाली नदी माथी तुईन तरेर भारत तर्फ जाने क्रममा भारतीय एसएसबीले तुईन काट्दा जयसिह धामी महाकाली नदीमा खसेर बेपत्ता भए।

व्यास गाउँपालिका–२ मालका ४र५ जना स्थानीयहरु शुक्रबार मालघाटमा महाकाली नदी माथि तुईन तरेर भारतको बाटो हुदै दार्चुला सदरमुकाम खलंगा बजार आउन लागेका थिए। दुई जना महाकाली नदीमा तुईन तरि भारतको सडकमा पुगिसकेका थिए। तुईनमा तर्ने पालो जयसिह धामीको थियो।

धामी तर्ने बेला दुई जना भारतीय एसएसबी पुगेको थिए। तर ती एसएसवीले तुईनमा तर्दै गर्दा तार काट्दा तार सहित जयसिंह धामी नदीमा खसेको स्थानीयहरु बताउँछन्। बैदेशिक रोजगारीमा जानका लागि गाउँबाट काठमाडौं हिडेका धामी घर नजिकै महाकालीमा बेपत्ता भएपछि परिवार शोकमा डुवेको छ।

तुईन काट्ने एसएसबीहरु विरुद्ध वेपत्ता धामीका आफन्तले तुईन नजिकको क्षेत्रमा रहेको भारतको पिथौरागढ जिल्ला धार्चुला तहशिलको पागला प्रहरी थानामा उजुरी दिएका छन्।

भारत स्वतन्त्र हुनुभन्दा पहिले देखि नेपाल भारतको क्षेत्रमा आवतजावतका लागि तुईनहरु लगाइदै आएको तथा नेपाल भारतका नागरिकहरुको आपसी सम्बन्धका कारण पनि यसरी सीमा क्षेत्रमा आवतजावत हुदै आइरहेको उजुरीमा भारतीय प्रहरीलाई जानकारी गराएको छ। घटना भएपछि एसएसबीहरु भागेको तथा त्यस क्षेत्रमा रहेका नेपालीहरुलाई यसबारे कसैलाई नभन्न धम्क्याएको समेत उजुरीमा उल्लेख छ।

उक्त घटनाबारे मुचुल्का लिई प्राथमिक रिपोर्ट बनाउनका लागि पागला प्रहरीलाई स्थानीय बहादुर सिह धामी र जोगा सिह धामीले उजुरी पत्र दिएका छन्। घटनाको सत्यतथ्य छानबिन गरी दोषिलाई कारवाही गर्न आफन्तहरुले दार्चुला र भारत दुबैतर्फका प्रशासनलाई अनुरोध गरेका छन्।

एसएसबीले तुईन काट्दा धामी नदीमा खसेको भन्दै तुईन काट्ने एसएसबी हरुलाई कारवाही हुनुपर्ने माग सहित व्यासका स्थानीयहरुले दार्चुलाका प्रमुख जिल्ला अधिकारी सिद्धराज जोशीलाई ज्ञापन पत्र बुझाएका छन्।

महाकाली नदीमा तुईन तरेर भारत जादाँ नेपाली नागरिक महाकाली नदीमा बेपत्ता भएको घटनाबारे छानविन गर्न दार्चुलाका प्रमुख जिल्ला अधिकारी सिद्धराज जोशीले भारतको पिथौरागढका जिल्ला अधिकारी आनन्द स्वरुपलाई पत्राचार गरेका छन्।

नेपाल तर्फबाट पनि घटनाबारे छानविन भइरहेको उनको भनाई छ। घटनाको नेपाल प्रहरी, सशस्त्र प्रहरी र राष्ट्रिय अनुसन्धानको टोलीले घटनास्थल पुगेर अनुसन्धान गरिरहेको छ ।

नेपाल सरकारका गृहमन्त्री बालकृष्ण खाँणले गृहसचिवको नेतृत्वमा छानबिन समिति गठन गरेका हुन्। समितिमा गृह मन्त्रालयका प्रवक्ता, नेपाल प्रहरीका सुदूरपश्चिम प्रहरी प्रमुख डीआईजी र दार्चुलाको सहायक प्रमुख जिल्ला अधिकारी सदस्य छन्। जतिसक्दो छिटो सत्यतथ्य छानबिन गरेर प्रतिवेदन पेश गर्न समितिलाई निर्देशन दिइएको छ।