निर्माणाधीन हुलाकी राजमार्गअन्तर्गत कैलालीको वसन्ता क्षेत्रमा ४ वर्षदेखि रोकिएको ट्र्याक खुलेसँगै अब बाँकी हुलाकी सडक निर्माणले गति लिने भएको छ।

वसन्ताका रूख काट्नका लागि वन मन्त्रालयले ४ वर्षसम्म अनुमति नदिएपछि त्यस क्षेत्रमा ट्र्याक खुल्न सकेको थिएन। सडक विभाग र वन मन्त्रालयबीच ४ वर्षसम्म वन क्षेत्र कटानका लागि तयार पारिएको फाइल ओहोरदोहोर चलेको थियो।

लामो समयसम्म अड्किएको वसन्ता वनका रूख काट्न गत फागुनमा मन्त्रिपरिषद्को बैठकले आदेश दिएको थियो। मन्त्रिपरिषद्को आदेशसँगै वैशाख २३ गतेबाट रूख काट्न सुरु भएको थियो। हुलाकी सडकअन्तर्गत वसन्ता सडकखण्डमा सय वटा रूख काटिएका छन्। रूख काटिएपछि अहिले सडक निर्माणसमेत सुरु भइसकेको छ।

सडकमा एक लियर माटो हालिसकेको छ। ‘रूख काटिसकेपछि एक लियरसम्म माटो फिलिङ गर्ने कार्य भयो’, हुलाकी सडक आयोजनाका इन्जिनियर पदम मडैले भने। वर्षा लागेपछि काम रोकिएको उनले बताए।

लामो समयको प्रतीक्षापछि वसन्ता क्षेत्रको रूख काट्ने आदेश आएको उनले जानकारी दिए। अहिले रूख काटेर ट्र्याक खोलिएको उनले बताए।

कैलालीको कैलारी गाउँपालिका–५ को कटैनी नदीदेखि छटकपुर वसन्तासम्म पर्ने दुई किमि खण्डमा रूख कटानको आदेश नहुँदा चार वर्षदेखि काम रोकिएको थियो।

कैलारीको कटैनी नदीदेखि भजनी नगरपालिकाको लालबोझीसम्म वसन्ता वनक्षेत्रमा जम्मा १८ मध्ये १६ किमिमा राजमार्ग निर्माण भइसकेको छ। तर, कानुनी अड्चनका कारण दुई किमि खण्डमा भने काम रोकिएको थियो। जसले गर्दा उक्त सडक भएर जानुपर्दा घुमाउरो बाटो भएर जानुपर्ने बाध्यता थियो।

सो खण्डमा राजमार्ग निर्माणका लागि ०७३ सालमै ठेक्का भए पनि काम अगाडि बढ्न सकेको थिएन। वसन्ता वन क्षेत्र करिडोर भएको भन्दै धेरै बहस भए पनि अन्तिममा सरकारले रूख काट्न आदेश दिएको हो। वसन्ता करिडोर वन्यजन्तुको पुरानो जैविकमार्ग रहेकाले राजमार्ग विस्तार गर्दा अण्डरपास र ओभरपास पुल हुनुपर्ने अडान राख्दै डिभिजन वन कार्यालयले रूख कटान आदेश प्राप्तिका लागि फाइल अड्किएको थियो।

कैलालीमा सन् २०१० देखि हुलाकी राजमार्ग निर्माण सुरु भएको थियो। दशक पूरा भइसके पनि निर्माण भने अझै पूरा हुन सकेको छैन। कान्दा नदीमा पुल निर्माण सम्पन्न नहुँदा पनि समस्या भएको छ।

०७३ सालमै सो खण्डमा राजमार्ग विस्तारका लागि ठेक्का भएको थियो। कैलालीमा मोहना पुलमा ७ सय मिटर, भजनीमा ५ सय मिटर र वसन्तामा २ किमिबाहेक सबै ठाउँमा पिच सम्पन्न भइसकेको छ।

आयोजना कार्यालयका अनुसार २ पुलको समेत अझै ठेक्का हुन सकेको छैन। यसैगरी, कैलालीमा निर्माणाधीन हुलाकी राजमार्गलाई चार लेनमा विस्तार गर्ने कार्य भइरहेको छ। धनगढीको क्याम्पस चौकदेखि कालिका मन्दिरसम्म चार लेनको सडक बनाउने काम धमाधम भइरहेको छ।

बजार क्षेत्रमा हुलाकी राजमार्गलाई चौडा बनाउने सरकारको निर्णयअनुसार धनगढीमा चार लेनमा राजमार्ग विस्तार गर्ने कार्य अगाडि बढाइएको हुलाकी राजमार्ग आयोजनाको कार्यालयले जनाएको छ।

हुलाका आयोजना कार्यालयका अनुसार फोर लेन सडकमा २० प्रतिशत भौतिक प्रगति भएको छ। ‘काम तीव्र गतिमा अगाडि बढेको छ’, आयोजनाका इन्जिनियर पदम मडैले भने, ‘साढे तीन किमि दूरीमा चार लेनको सडक बन्ने हो।’ यो खण्डमा चार लेनको हुलाकी राजमार्ग बनाउन ०७७ असारमा ठेक्का सम्झौता भएको थियो।

हाल नाली, पर्खाल र कल्भर्ट बनाउने कार्य भइरहेको छ। इन्जिनियर मडैका अनुसार चार लेन राजमार्गमा बीचमा दुई मिटर मेडियन र त्यसको दायाँ–बायाँ दुवैतिर सात–सात मिटरको कालोपत्रे हुनेछ।

त्यसैगरी, राजमार्गको दुवैतिर नाली र नालीमाथि फुटपाथ निर्माण हुनेछ। फुटपाथ बाटो साढे तीन –तीन मिटर चौडा रहने इन्जिनियर मडैले बताए।

चार लेनको राजमार्ग निर्माणका लागि स्वच्छन्द जोशी जेभीले भ्याटसहित ३७ करोड ४३ लाख रुपैयाँमा ठेक्का पाएर काम गरिरहेको छ। यो राजमार्ग निर्माणको समयावधि ३० महिना रहेको छ।

यसैगरी, धनगढीदेखि सत्तीसम्मको ४४ किमि हुलाकी राजमार्गको बाँकी खण्डमा दुई लेनमा सडक विस्तार गर्ने कार्य पनि अगाडि बढेको छ।