काठमाडौँ – नेकपा एमालेका अध्यक्ष केपी शर्मा ओलीले कम्युनिस्ट आन्दोलनलाई नै विभाजित गरेर समाप्त पार्न खोजिएको बताएका छन् ।
संसद् अधिवेशन अन्त्य भएसँगै सोमबार राति पाँच बुँदे विज्ञप्तिमार्फत् अध्यक्ष ओलीले अब सरकारले राजनीतिक दल विभाजनसम्बन्धी अध्यादेश ल्याउने र एमालेलाई विभाजन गर्ने षड्यन्त्र भइरहेको बताएका हुन् ।
‘पूर्व घोषित प्रतिबद्धता विपरीत प्रतिनिधिसभाको चालु अधिवेशन हठात् अन्त्य गरेर राजनीतिक दल विभाजन सम्बन्धी अध्यादेश ल्याउने र नेकपा (एमाले) लाई विभाजित गर्ने पडयन्त्र गरिँदैछ’ उनले विज्ञप्तिमा भनेका छन् । एमाले र यस पार्टीको संसदीय दलमा विभाजन गर्ने कुनै पनि बहाना वा पडयन्त्र पार्टीका लागि मान्य र क्षम्य नहुने उनको भनाई छ ।
अध्यक्ष ओलीले दल विभाजनका प्रयासहरूविरूद्ध दृढताका साथ उभिन सम्पूर्ण नेता, कार्यकर्ताहरुलाई आह्वान पनि गरेका छन् । उनले भनेका छन्, ‘तसर्थ पार्टीका सम्पूर्ण नेता, कार्यकर्ता प्रतिनिधि सभा तथा राष्ट्रिय सभाका माननीय सदस्यहरूलाई पार्टी वा संसदीय दल विभाजनका प्रयासहरूविरूद्ध दृढताका साथ उभिन हार्दिक अपिल गर्दछु।’
