कैलालीमा नेकपा एमालेबाट निर्वाचित आठवटै स्थानीय तहका प्रमुख नेकपा एमालेमै रहने देखिएको छ । १३ स्थानीय तहमध्ये स्थानीय निर्वाचनमा कैलालीका आठवटा स्थानीय तहमा नेकपा एमालले जित हासिल गरेको थियो भने छवटा स्थानमा उपप्रमुख विजयी भएका थिए । टीकापुर नगरपालिका र भजनी नगरपालिकामा भने एमालेले प्रमुख पदमा जित हात पार्दा उपप्रमुखमा पराजय बेहोरेको थियो ।
निर्वाचित उपप्रमुखमध्ये कैलालीको गोदावरी नगरपालिकाकी उपप्रमुख रत्ना कडायत, घोडाघोडी नगरपालिकाकी उपप्रमुख प्रेमाकुमारी थापा र मोहन्याल गाउँपालिकाकी उपाध्यक्ष पूजादेवी बुढामगरले नेकपा (एकीकृत समाजवादी) पार्टी रोजेका हुन् । कैलालीको मोहन्याल गाउँपालिकाका प्रमुखको निधन भएको छ भने स्थानीय निर्वाचनमा नेकपा (माओवादी केन्द्र)बाट निर्वाचित भजनी नगरपालिकाकी उपप्रमुख छाया देवकोटा नेकपा एमालेमा प्रवेश गरेकी छन् ।
कैलालीको चुरे गाउँपालिकाका प्रमुख र उपप्रमुख, गौरीगंगा नगरपालिकाका प्रमुख र उपप्रमुख, लम्कीचुहा नगरपालिकाका प्रमुख र उपप्रमुखले एमालेलाई रोज्दा गोदावरी नगरपालिका, घोडाघोडी नगरपालिका, टीकापुर नगरपालिका र भजनी नगरपालिकाका प्रमुख एमालेमै रहेका छन् ।
एमालेबाट निर्वाचित जनप्रतिनिधिमध्ये कैलालीमा तीन उपप्रमुख, वडा अध्यक्ष र सदस्य गरी ५२ जनाले नेकपा (एकीकृत समाजवादी) पार्टी राजेका छन् । नेकपा (एस) रोज्ने वडा अध्यक्षहरूमा धनगढी उपमहागरपालिका- १४ का अध्यक्ष रामबजारी चौधरी, गौरीगंगा नगरपालिका-५ का वडा अध्यक्ष जंगबहादुर बिक, गोदावरी नगरपालिका-५ का अध्यक्ष कर्णसिंह बोहरा, टीकापुर नगरपालिका- १ का अध्यक्ष गंगाराम आचार्य, गौरीगंगा नगरपालिका-७ का अध्यक्ष दलबहादुर कुमाल रहेका छन् । यसैगरी घोडाघोडी नगरपालिकाका-२ वडा अध्यक्ष, लम्कीचुहा नगरपालिका- १ का वडा अध्यक्षसहितले नेकपा (एस) रोजेका छन् ।