संविधान दिवसको अवसरमा धनगढीमा निःशुल्क स्वास्थ्य परीक्षण गरेको छ । नसर्ने रोग जोखिम न्यूनीकरण गर्ने तथा ज्येष्ठ नागरिकहरूलाई स्वास्थ्य सेवाको मूल धारमा ल्याउने सरकारको उद्देश्य अनुसार स्वास्थ्य परीक्षण गरिएको हो । प्रदेश सरकारको मुख्यमन्त्री ज्येष्ठ नागरिक कार्यक्रम अनुसार कैलालीमा केही स्थानीय तहहरूमा ज्येष्ठ नागरिक कार्यक्रम लागु भएको छ ।
ज्येष्ठ नागरिकहरूका स्वास्थ्य समस्याहरूलाई उठान गर्ने स्वास्थ्य बिमा कार्यक्रममा सहज पहुँच बनाउने तथा टोल टोलमा स्वास्थ्य परीक्षण कार्य गर्ने जस्ता कार्यक्रम रका छन । २०१८ को प्रतिवेदनअनुसार नसर्ने रोगको भार ६० प्रतिशत बाट बढेर ६६ प्रतिशत रहेको छ । कार्यक्रममा १ सय २५ जनाले स्वास्थ्य परीक्षण गरी स्वास्थ्य सेवा लिएका थिए। टोलवासीहरूको स्वास्थ्य परीक्षणमा तौल, उचाइ , रक्तचाप , मधुमेह , पेटको मापन , बिएम आइ , आवश्यकता अनुसारको औषधि ,स्वास्थ्य परामर्श , स्वास्थ्य शिक्षाबारे जानकारी दिइएको थियो ।
स्वास्थ्य कार्यालयको सहयोग तथा सुन्दर नगर टोल विकास समितिको आयोजनामा कार्यक्रम भएको थियो । कार्यक्रममा धनगढी उपमहानगरपालिका वडा न ५ का वडा अध्यक्ष हिरा सिंह पातली प्रमुख अतिथि रहेका थिए । सुन्दर नगर टोल विकास समितिका अध्यक्ष चेत बहादुर थापाको अध्यक्षतामा भएको कार्यक्रमको सञ्चालन मीन बहादुर धामीले गरेका थिए ।
