दार्चुलाको अपिनाम्पा संरक्षण क्षेत्रमा बर्सेनि राजस्व बढ्दै गएको छ । जिल्लाको एक मात्र संरक्षण क्षेत्र अपिनाम्पामा सङ्कलित राजश्वमध्ये अधिकांश हिस्सा जडीबुटीको हो । आर्थिक वर्ष ०७७⁄०७८ मा एक करोड ४ लाख राजश्व सङ्कलन गरेकोमा गत आर्थिक वर्ष २०७८⁄०७९ मा २ करोड ५० लाख राजश्व सङ्कलन गरीएको गरीएको प्रमुख संरक्षण अधिकृत नुरेन्द्र अर्यालले जानकारी दिए ।
‘हरेक वर्ष राजश्व बढिरहेको छ । अघिल्लो आर्थिक वर्षको तुलनामा गत वर्ष हामीले दोब्बरले राजश्व सङ्कलन गर्न सकेका छौँ। यो हाम्रो उपलब्धि हो । अपिनाम्पा संरक्षण क्षेत्रमा सङ्कलित राजश्वमध्ये अधिकांश हिस्सा जडीबुटीको नै छ,’ प्रमुख संरक्षण अधिकृत नुरेन्द्र अर्यालले भने ।
कार्यालयका अनुसार सुरुको वर्ष २०६७⁄६८ मा ५ लाख ६१ हजार ९ सय ८० रुपैयाँ राजश्व सङ्कलन भएको थियो ।
संरक्षण क्षेत्र घोषणा भएको दोस्रो वर्ष २०६८⁄६९ मा ९५ लाख ३८ हजार ६ सय ८८ रुपैयाँ, आर्थिक वर्ष २०६९⁄७० मा ७८ लाख २७ हजार ६ सय ९६ रुपैयाँ र आर्थिक वर्ष २०७०⁄७१ मा १ करोड २ लाख ३३ हजार ७ सय ५९ रुपैयाँ राजश्व सङ्कलन भएको थियो ।
यसै गरी, २०७१⁄७२ मा ८६ लाख ४७ हजार ४ सय ९९ रुपैयाँ, आर्थिक वर्ष २०७२⁄७३ मा १ करोड ७३ लाख ४५ हजार ४८ रुपैयाँ र २०७३⁄७४ मा २ करोड ३ लाख ८९ हजार ५ सय ९१ रुपैयाँ राजश्व सङ्कलन भएको थियो ।
आर्थिक वर्ष २०७४र७५ मा भने अहिलेसम्मकै धेरै २ करोड ४४ लाख १४ हजार ९७ रुपैयाँ राजश्व उठेको अपिनाम्पा संरक्षण क्षेत्र कार्यालयको तथ्याङ्क छ ।
कार्यालयमा सङ्कलन भएको राजश्व नेपाल सरकारको सञ्चित कोषमा जम्मा हुने गरेको छ । नेपाल सरकारले सङ्कलित राजश्वको ३० देखि ५० प्रतिशत रकम संरक्षण क्षेत्रको विकासका लागि उपलब्ध गराउने कानुनी व्यवस्था रहेको प्रमुख संरक्षण अधिकृत अर्यालले जानकारी दिए ।
२०६७ सालमा स्थापना गरीएको अपिनाम्पा संरक्षण क्षेत्रमा हिउँ चितुवा, रेड पाण्डा, मृग, रतुवा, घोरल, नाउर, झरल, कालो भालु, दुम्सी, थार लगायत वन्यजन्तु पाइने गरेका छन् । डाँफे मुनाल, चिर, चिल, भ्याकुर, च्याखुरा लगायत दुई सय भन्दा बढी प्रजातिका चराहरूको समेत वासस्थानका रूपमा रहेको यो क्षेत्रमा अपि हिमाल र नाम्पा हिमाल पनि पर्दछन् ।
