कैलालीको टिकापुरमा स्वास्थ्य प्रवर्द्धनात्मक आयुर्वेद स्वास्थ्य शिविर सम्पन्न भएको छ ।प्रादेशिक स्वास्थ्य प्रवर्द्धन केन्द्र कञ्चनपुरको आयोजना तथा टिकापुर नगरपालिकाको समन्वयमा श्री सरस्वती माध्यमिक बिद्यालय बन गाउँमा स्वास्थ्य प्रवर्द्धनात्मक आयुर्वेद स्वास्थ्य शिविर सम्पन्न भएको हो ।
टिकापुर नगरप्रमुख रामलाल डगौराको प्रमुख आतिथ्य र प्रादेशिक स्वास्थ्य प्रवर्द्धन केन्द्र कञ्चनपुरका प्रमुख हेमराज खड्का अध्यक्षतामा एक समारोह आयोजना गरी शिविरको उद्घाटन गरिएको थियो।
शिविरमा वरिष्ठ मुटु रोग विशेषज्ञ डा. कृष्ण चन्द्र अधिकारी, फिजीसियन डा.सुमन चौधरी, आयुर्वेद चिकित्सक डा. दुर्गा प्रसाद ढुङ्गाना, डेनटल चिकित्सक डा. सन्तोष पण्डित, मेडिकल अधिकृत डा. प्रेम भट्ट लगायतका चिकित्सकहरूबाट आयुर्वेद स्वास्थ्य सेवा २५९ जना, मुटु रोग परीक्षण २२९जना, फोक्सो सम्बन्धी जाँच ७९ जना, दाँत सम्बन्धी सेवा ८० जना, ज्येष्ठ नागरिकलाई सहायक सामाग्री लौरो ८० जनालाई वितरण गरिएको छ ।
नसर्ने रोग रोकथाम गर्न शारीरिक तन्दुरुस्त कायम गर्न दैनिक Indoor दौड गर्ने एक ९१० थान Traid Mail मेयर डगौरा मार्फत प्रादेशिक स्वास्थ्य प्रवर्द्धन केन्द्र कञ्चनपुरका प्रमुख खड्काले विद्यालयका का.भा. अध्यक्ष अमर बहादुर पुनमगरलाइ हस्तान्तरण गरेका छन्।
कार्यक्रममा बोल्दै नगर प्रमुखले रोगको उपचार भन्दा उपचार नै नगर्ने वातावरण बनाउन स्वास्थ्य प्रवर्द्धनात्मक कार्यक्रम तथा आयुर्वेद औषधि पद्धतिको विकासमा जोड दिने प्रतिबद्धता गरे।
५ वर्षदेखि १५ वर्षसम्मका बालबालिकामा देखिने जन्मजात मुटु रोग तथा मुटुको वाथरोगको स्क्रिनिङ्ग गरी समयमै रोग लाग्न नदिने स्वास्थ्य शिक्षा विद्यालय कार्यक्रम मार्फत दिनुपर्ने प्रादेशिक स्वास्थ्य प्रवर्द्धन केन्द्र कञ्चनपुरका प्रमुख हेमराज खड्काले बताए ।