गत सोमवार देखीको अविरल वर्षाका कारण सुदूरपश्चिम प्रदेशको जनजीवन प्रभावित वनको छ । प्रदेशका ९ जिल्लामध्ये हाल सम्म ५ जिल्लामा बाढी–पहिरोका घटना भइरहेका छन् । कैलाली–कञ्चनपुरका केही स्थानमा बाढी र बाजुरा,बझाङ र डडेल्धुराका केही स्थानमा पहिरो गएको सुदूरपश्चिम प्रदेशको प्रदेश आपतकालिन कार्य सञ्चालन केन्द्रले जनाएको छ ।
केन्द्रको तथ्याङ्क अनुसार श्रावण २२ यता मात्रै पहिरोबाट बझाङको साइपाल गाउँपालिका वडा नम्बर ४ को एक परिवार बाजुराको खप्तडछेडेदह गाउँपालिका २ का १ परिवार विस्थापित भएका छन भने डडेल्धुराको पशुराम गाउँपालिका ५को १ परिवार प्रभावित भएका छन् ।
हाल सम्म सबै भन्दा बढी क्षति भने बाढीबाट भएको छ ।
कैलाली–कञ्चनपुरका ९ सय ५४ परिवार प्रभावित र २ सय ३२ परिवार विस्थापित भएका छन् । बाढीबाट कैलालीको धनगढी,कैलारी,भजनी,जोशीपुर जानकी र टिकापुर क्षेत्र डुबानमा छन् । यस्तै कञ्चनपुरको पुर्नवास क्षेत्र पनि डुबानको चपेटामा छ । सडक माथिबाट पहिरो आएपछि पूर्णरुपमा अवरुद्ध रहेको कैलालीको गोदावरी नगरपालिका ४ बुढी तोला स्थित सडकखण्ड खुलाउने प्रयास भइरहेको छ । बाढी पहिरोबाट हाल सम्म सुदूरपश्चिममा मानवीय क्षति भने भएको छैन ।
