मलेसियामा जारी चार देश सम्मिलित महिला टी–ट्वान्टी आई सिरिजको उपाधी नेपालले जितेको छ । आज सम्पन्न फाइनल खेलमा हङकङलाई १३ रनले हराउदैं नेपालले सिरिज हात पारेको हो ।
हङकङले दिएको १०२ रनको लक्ष्य पन्छाएको नेपालले ५ दशमलब ३ ओभरमा ३७ रन बनाएको अवस्थामा पानी परेको थियो । पानी पर्ने क्रम नरोकिएपछि डिएल मेथडअनुसार नेपालले हङकङलाई १३ रनले स्तब्ध पार्दै उपाधि जितेको हो ।
नेपालका लागि इन्दु बर्मा १९ र सितारानामगरले १३ रनमा अविजित रहिन् । त्यसअघि बायोमास ओभलमा टस हारेर ब्याटिङ गरेको हङकङले निर्धारित २० ओभरमा ६ विकेटको क्षतीमा १०१ रन बनाएको थियो ।
उसका का यिङ चानले २९,मरीना बुओनोकोर एन्टोनिया लैम्प्लो १९ रनको योगदान गरे । नेपालका लागि खुसी डंगोलले ३, कविता जोशीले १,अस्मिना कर्माचार्यले १ विकेट हात पारे ।
नेपाल पहिलो तथा हङकङ लिगमा दोस्रो हुँदै फाइनल पुगेका हुन् । नेपाल हङकङ र मलेसियाको समान चार अंक भएपनि रनरेटका आधारमा नेपाल पहिलो, हङकङ दोस्रो र मलेसिया तेस्रो स्थानमा रहेका थिए ।
नेपालले हङकङ, कुवेतलाई पराजित गर्दा मलेसियासँग पराजित भएको थियो भने हङकङले मलेसिया र कुवेतलाई पराजित गर्दा नेपालसँग पराजित भएको थियो । लिग चरणमा भएको भेटमा नेपालले हङकङलाई ६ विकेटले पराजित गरेको थियो ।
आयोजक मलेसियासहित नेपाल, हङकङ र कुवेत महिला टी–ट्वान्टी सिरिजमा सहभागी भएका थिए । यही अगष्ट ३१ तारिखदेखि मलेसियामै हुने आइसिसी महिला टी–२० विश्वकप एसिया क्वालिफायरको तयारीस्वरुप नेपालले उक्त सिरिज खेलेको हो ।
