कैलालीका उद्योग ब्यवसायीले सरकारको कर र बैंक ब्याजदरका कारण धराशायी बनेको बताएका छन्। शनिबार कैलाली उद्योग वाणिज्य संघको ४९औँ बार्षिक साधारण सभामा बोल्दै उनीहरुले सो कुरा बताएका हुन्।

कार्यक्रममा सहभागीहरुलाई स्वागत गर्दै संघका बरिस्ठ उपाध्यक्ष पुष्कर ओझाले अहिलेको परिस्थितिमा ब्यबसायीक क्षेत्र निकै अप्ठ्यारोमा परेको बताए। उनले यसको समग्र असर समाजको सबै क्षेत्रमा परेको जानकारी दिए। एकातिर सरकारको कर र अर्कोतिर बैंक ब्याजदरका कारण उद्योग ब्यबसायी धराशायी बनेका छन् उनले भने, निजि क्षेत्रलाई ब्यबसाय गर्ने बाताबरण सहज रूपमा बनाउन सरकारलाई आग्रह गर्छु।

यस्तै महासचिव ओमबहादुर विष्टले व्यापारीहरूले सटर भाडा तिर्न धौ-धौ भएको बताएका छन्। पछिल्लो समय व्यापार, व्यवसाय चौपट भएपछि उनीहरूलाई सटर भाडा तिर्न मुस्किल भएको हो। कोरोना महामारीले थला परेको व्यापार फष्टाउन नपाउँदै सडक विस्तारकालागि धनगढी बजारमा तोडफोड भएपछि व्यापार, व्यवसाय न्यून भएको उनको भनाइ छ। कैलाली उद्योग वाणिज्य संघका अध्यक्ष पुष्पराज कुँवरले चर्को बैंकको ब्याजका कारण उद्योग व्यवसाय धराशायी बन्न पुगेको बनाए।

सरकारले हरेक कुरामा कर मात्रै उठाएको तर व्यवसायीहरूलाई सहूलियत दिन नसकेको अध्यक्ष कुँवरको आरोप छ। सरकारले हामीबाट कर मात्रै लिइरहेको छ तर खर्च गर्न सकिरहेको छैन,’ उनले भने, ‘राज्यले निर्माण व्यावसायीहरूको ७०/८० अर्ब भुक्तानी गर्न सकेको छैन।’ अध्यक्ष कुँवरले धनगढी उपमहानगरपालिकाले करमाथि कर लगाएर यहाँका व्यावसायीहरूलाई हैरान बनाएको बताए। ‘धनगढीले करमाथि कर लगाएको छ। व्यापारीहरूका निवेदनहरू आइरहेका छन्।

करमाथि कर लगाउनु भएन,’ उनले भने,‘हिजो उहाँ (मेयर गोपाल हमाल) व्यावसायी नै हुनुहुन्थ्यो। उहाँबाट व्यावसायीहरूका समस्या समाधान होलान् भन्ने आश गरेका थियौं तर आज सबै व्यावसायीहरू निराश भएको अवस्था छ।’उनले करकै कारण धनगढीमा मात्रै ३०/३५ प्रतिशतले व्यवसाय छोडिसकेको बताए। धनगढी बजार क्षेत्रका धेरै सटरहरू खाली भइसकेको उनको भनाइ छ। तीनै तहका सरकारले व्यावसायीहरूका पीरमार्काहरू नबुझेको उद्योग ब्यवसायीहरुले गुनासो गरेका छन् ।

यस्तै सुदुरपश्चिम प्रदेश सरकारका उद्योग, बन तथा पर्यटन मन्त्री रमेश धामीले प्रदेश सरकारबाट हुने सहयोग आफु गर्न तयार रहेको उनले बताएका छन्। कैलाली उधोग बाणिज्य संघ को ४९ औं साधारण सभा कार्यक्रममा जिल्लाका विभिन्न नगर उधोग संघका अध्यक्ष एबम प्रतिनिधि, विभिन्न राजनीतिक दलका प्रतिनिधि लगायत जिल्ला भरका व्यबसायीहरुको सहभागीता रहेको थियो । संघले बिगतमा विभिन्न कालखण्डमा यस क्षेत्रको बिकासमा नेतृत्वदायी भुमिका निर्बाह गर्दै आएको छ। कैलाली उधोग बाणिज्य संघ प्रदेश कै अग्रणी संस्था हो। संघको स्थापना २०२७ सालमा भएको थियो। संघको स्थापना भएको ५३ बर्ष भएको छ।