धनगढी – भारतबाट आयात हुने खाद्य तथा कृषि जन्य पदार्थ आयात ठप्प भएपछि यहाँका व्यापारीहरु प्रदेश सरकार समक्ष प्लान्ट क्वारेन्टाइन टुरमुकाम कार्यालय सुचारु गर्न माग गरेका छन् ।
कैलालीको त्रिनगर भन्सार कार्यालयमा ३ वर्ष अगाडि स्थापना गरिएको प्लान्ट क्वारेन्टाइन टुरमुकाम कार्यालय साउन २८ गतेयता बन्द छ । बन्द भएपछि कैलाली भन्सार भएर भारतबाट आउने खाद्यान्न, तरकारी, फलफूलको आयात ठप्प भएपछि सो कार्यालय सुचारु गर्न माग गरेका हुन् ।
कैलालीको उद्योग वाणिज्य संघले टुरमुकाम बन्द नगर्न आइतबार धनगढीमा पत्रकार सम्मेलन गरेर सरकारसँग माग गरेको हो । संघले सुदूरपश्चिम प्रदेशका मुख्यमन्त्री कमल बहादुर शाहलाई माग सम्बोधनको लागि ज्ञापनपत्र समेत बुझाएको छ ।
साउन २८ गतेदेखि कैलाली भन्सार कार्यालय परिसरमा रहेको प्लान्ट क्वारेन्टाइनको मोहना टुरमुकाम कार्यालय बन्द रहेको छ । कार्यालयमा कार्यरत कर्मचारी अध्ययन बिदामा गएका बेला प्लान्ट क्वारेन्टाइन तथा विषादी परीक्षण केन्द्र काठमाडौँले टुरमुकाम कार्यालयमा कर्मचारी नपठाएर बन्द गर्न खोजेको संघको भनाइ छ ।
कैलाली भन्सार भएर भारतबाट आउने खाद्यान्न, फलफूल र तरकारीको विषादी र किराको परीक्षण गरेर निकासी र पैठारी म्को इजाजत दिने काम टुरमुकाम कार्यालयले गर्दै आएको थियो ।
कैलाली उद्योग वाणिज्य संघका अध्यक्ष पुष्पराज कुँवरले भने, ‘सरकारको अस्पष्ट नीतिका कारण उद्योगी, व्यवसायीका साथै आम उपभोक्तामा पर्न गएको असर र आर्थिक मारका कारण सिर्जना भएको अन्योलताबाट हामी झस्किएका छौ ।’
अस्पष्ट नीतिका कारण त्यसको असर उपभोक्तामा पर्ने बताइएको छ । यहाँबाट आयात ठप्प हुँदा धनगढी भन्सार नाकाबाट आउने धान, चामल, गहुँ, दाल, तेलहन, तरकारी, फलफूल, खाद्य योग्य, पशुपक्षी आहारका लागि चाहिने कच्चा पदार्थ र खाद्य वस्तुलगायतको अन्य खाद्यवस्तु नेपालगंज नाकाबाट ल्याउनुपर्ने बाध्यता सिर्जना भएको बताइएको छ । जसको असर वस्तुमा प्रतिकेजी २३ रुपैयाँ मूल्य वृद्धि हुने र उपभोक्ता मारमा पर्ने व्यवसायीको गुनासो छ ।
२२ दिनदेखि खाद्यान्न, तरकारी र फलफूल नआएको कैलाली भन्सार कार्यालयले जनाएको छ । प्लान्ट क्वारेन्टाइन कार्यालयले नेपाल आयात हुने खाद्यान्न,तरकारी र फलफूलमा किराजन्य संक्रमण चेकजाँच गर्छ । खाद्य प्रविधिको जाँच गरेपछि प्लान्ट क्वारेन्टाइनले किराजन्य संक्रमणको जाँच गरेपछि मात्रै खाद्यान्न, तरकारी र फलफूलजन्य वस्तु नेपाल भित्रिने गर्छ । सुदूरपश्चिमका लागि प्लान्ट क्वारेन्टाइनको मुख्य कार्यालय कञ्चनपुरको गड्डाचौकी नाकामा छ । गड्डाचौकी– बनबासा नाकाबाट सामान आयात गर्नका लागि भारतले शारदा नदीको पुलमा बढी भार भएका मालबाहक साधन आउन दिँदैन । नेपालगञ्जको रुपैडिहा नाका भएर आयात गरे प्रदेशको राजश्वमा पनि कमी आउने र खाद्यान्न, तरकारी र फलफूलको मूल्य पनि बढ्ने व्यवसायीहरुले बताएका छन् ।
